საგარეო ურთიერთობათა კომიტეტის სხდომა, სადაც რუსეთთან ურთიერთობების საკითხებში პრემიერ-მინისტრის სპეციალურ წარმომადგენელს ზურაბ აბაშიძეს უსმენენ, დაიხურა.

სხდომის დახურვამდე ოპოზიციონერმა დეპუტატებმა: სალომე სამადაშვილმა, გიგა ბოკერიამ და გიგი წერეთელმა თავიანთი პოზიციები დააფიქსირეს და აღნიშნეს, რომ სხდომის მხოლოდ ნაწილი დაიხუროს, დანარჩენი კი ღიად ჩატარდეს. თუმცა, „პატრიოტთა ალიანსის“ წევრმა ადა მარშანიამ აღნიშნა, რომ „ოპოზიციას შოუს მოწყობის საშუალება არ უნდა მიეცეს“ და სხდომა უნდა დაიხუროს. სხდომის დახურვის გადაწყვეტილება კენჭისყრის შემდეგ მიიღეს. 8 დეპუტატმა სხდომის დახურვას დაუჭირა მხარი, ხოლო 4 დეპუტატი წინააღმდეგი იყო.

ცნობისთვის, კომიტეტის სხდომაზე ასევე მიწვეულია საგარეო საქმეთა მინისტრის მოადგილე ლაშა დარსალია.

საგარეო ურთიერთობათა კომიტეტში მოსმენა შემდეგ თემებთან დაკავშირებით გაიმართება: - ოკუპირებული ტერიტორიები, არაღიარების პოლიტიკა, ჟენევის საერთაშორისო მოლაპარაკებები, SGS, აბაშიძე - კარასინის ფორმატი.