მირზა სუბელიანს პატიმრობის ვადა 4 თვეში ეწურება

ხორავას ქუჩაზე მომხდარი მკვლელობის საქმეზე, დანაშაულის დაფარვისთვის მსჯავრდებული პროკურატურის ყოფილი თანამშრომელი, მირზა სუბელიანი გლდანის მე-8 პენიტენციურ დაწესებულებას 4 თვეში, 9 ივლისს დატოვებს.

თბილისის საქალაქო სასამართლომ სუბელიანს 1 წლითა და 1 თვით პატიმრობა შეუფარდა, საიდანაც მას 9 თვე მოხდილი აქვს.

მოსამართლის, ლელა ნოზაძის გადაწყვეტილებით, მირზა სუბელიანს ბრალდება სსკ-ის 376-ე მუხლიდან, დანაშაულის შეუტყობინებლობიდან 375-ე მუხლით, დანაშაულის დაფარვით გადაუკვალიფიცირდა.

შეგახსენებთ, რომ პროკურატურის ყოფილი თანამშრომელი, მირზა სუბელიანი ხორავას ქუჩაზე მომხდარი მკვლელობის საქმეზე 9 ივნისს დააკავეს. მას ბრალი სისხლის სამართლის კოდექსის 376-ე მუხლით აქვს წაყენებული, რაც დანაშაულის შეუტყობინებლობას გულისხმობს.