ხელში გვაქვს ფურცელი, რომელზეც რაღაც არის დაბეჭდილი და ისმება კითხვები, ამის გამო შინაგან საქმეთა მინისტრი პარლამენტში უნდა დავიბაროთ თუ - არა?- ამის შესახებ ფრაქცია "ქართული ოცნების" თავმჯდომარე მამუკა მდინარაძემ მამუკა ხაზარაძის მიერ პროკურატურაში წარდგენილ წერილთან დაკავშირებით განაცხადა.

„მოდით, შეფასებისგანაც კი თავი შევიკავოთ და ვთქვათ, ხელში რა გვაქვს. ეს იქნება პასუხი ყველაფერზე. ხელში გვაქვს ფურცელი, რომელზეც რაღაც არის დაბეჭდილი და ისმის კითხვა, ამის გამო შინაგან საქმეთა მინისტრი პარლამენტში უნდა დავიბაროთ თუ არა. როდესაც ადამიანი ჩვენებას აძლევს, მას აქვს ვალდებულება, სრულყოფილი ჩვენება მისცეს და გამოძიებას სრულყოფილი ინფორმაცია მიაწოდოს. თუ მამუკა ხაზარაძე შუამავალსაც არ ამბობს და სასამართლოში მხოლოდ ნაბეჭდი ფურცელი მიაქვს, დასკვნები ვინ ან როგორ უნდა გამოიტანოს? თუკი რამე სხვა მონაცემი იქნება, შეიძლება სხვაგვარად ვისაუბროთ. რაც ჩვენ დღეს ხელში გვაქვს, არაფერი სერიოზულის საფუძველს არ იძლევა, ეს ფაქტია," - განაცხადა მდინარაძემ.