ლევან დავითაშვილი რომან გოცირიძეს - მთლად ზუსტი  მაგალითი არ მოიყვანეთ, რომელიც წონასთან მიმართებაში მინისტრის შესაბამისობას უკავშირდებოდა

მე ვფიქრობ, რომ მთლად ზუსტი მაგალითი არ მოიყვანეთ, რომელიც წონასთან მიმართებაში მინისტრის შესაბამისობას უკავშირდებოდა, - ამის შესახებ გარემოს დაცვისა და სოფლის მეურნეობის მინისტრმა ლევან დავითაშვილმა „ნაციონალური მოძრაობის“ წევრის რომან გოცირიძის 140 კილოგრამამდე რქოსანი საქონლის ექსპორტის შეზღუდვასთან დაკავშირებით გაკეთებული განცხადების საპასუხოდ განაცხადა. ლევან დავითაშვილის განცხადებით, აღნიშნული რეგულაცია საჭიროა.

„ბატონო რომან, რა ვიცი, რა გითხრათ, მე ვფიქრობ, რომ მთლად ზუსტი მაგალითი არ მოიყვანეთ, რომელიც წონასთან მიმართებაში მინისტრის შესაბამისობას უკავშირდებოდა. რაც შეეხება მსხვილფეხა რქოსან პირუტყვთან დაკავშირებულ რეგულაციას, მე ვფიქრობ, რომ ეს რეგულაცია საჭიროა. ამ შემთხვევაში თავისუფალ ბაზარს რეაგირება და ადაპტირება შეუძლია, მაგრამ ხშირ შემთხვევაში, ეს მყისიერი არ არის ხოლმე. ჩვენ დავინახეთ, რომ რამდენიმე წელში მსხვილფეხა რქოსანი პირუტყვის რაოდენობა შეგვიმცირდა იმიტომ, რომ საქართველოდან ახალგაზრდა სანაშენე ჯოგი გავიდა. ჩვენ გარკვეული გათვლები გვაქვს, ამაზე გათვლები აქვთ ფერმერებს და ფერმერების ასოციაციებს. ეს არის მათი მხრიდან მხარდაჭერილი და მათი მხრიდან ინიცირებული რეგულაცია და შეზღუდვა“, - განაცხადა ლევან დავითაშვილმა.

„ახლა რომ მივიღოთ კანონი საქართველოში აიკრძალოს 140 კილოგრამს ქვემოთ ადამიანების პარლამენტში არჩევა ან მინისტრად განწესება, თუ იგი არის 140 კილოგრამზე ნაკლები, ამ კრიტერიუმით ბატონო ლევან, თქვენ ვერასდროს გახდებოდით მინისტრი“, - ასე მიმართა ფრაქცია „ნაციონალური მოძრაობის“ თავმჯდომარემ რომან გოცირიძემ პარლამენტის პლენარულ სხდომაზე გარემოს დაცვისა და სოფლის მეურნეობის მინისტრს ლევან დავითაშვილს.

რომან გოცირიძემ ეს განცხადება მთავრობის იმ დადგენილებაზე საუბრისას გააკეთა, რომლის თანახმადაც, 140 კილოგრამამდე რქოსანი საქონლის ექსპორტზე შეზღუდვა დაწესდა. რომან გოცირიძის თქმით, მთავრობის დადგენილებამ პრობლემები შექმნა ბაზარზე. გოცირიძე ლევან დავითაშვილისგან პასუხს ითხოვს, თუ ვინ უნდა აგოს პასუხი აკრძალვების დაწესებით გამოწვეულ ზარალზე.

მაია ბითაძე - ევროპამ 50 წლით გაგვისწრო, მაგრამ ნაბიჯ-ნაბიჯ ჩვენც მივყვებით
ქართული პრესის მიმოხილვა 12.11.2019
ვახტანგ ძაბირაძე - ოპოზიციაში არ ჩანს ოპოზიციური ძალა, რომელიც ოპოზიციურად განწყობილი პოლიტიკური ძალებისა და ელექტორატის ლიდერი გახდებოდა
„სამ რაან სპა-ცენტრი“ ევროპის საუკეთესო სპად დასახელდა