თუკი დადასტურდა, რომ ე.წ. შუამავალი ბადრი ჯაფარიძეა, ეს ფაქტი კიდევ უფრო ამძიმებს ვითარებას - შეუძლებელია ბადრი ჯაფარიძე, “თიბისი ბანკის“ ერთ-ერთი მთავარი აქციონერი, კურიერად განვიხილოთ, - ამის შესახებ ფრაქცია “ნაციონალური მოძრაობის“ თავმჯდომარემ რომან გოცირიძემ განაცხადა.

“რა მნიშვნელობა აქვს, მამუკა ხაზარაძე მიუტანს წერილს ბადრი ჯაფარიძეს, თუ ბადრი ჯაფარიძე - მამუკა ხაზარაძეს. პირდაპირ შს მინისტრის მიერ გადაცემა ბანკის აქციონერისა და ერთ-ერთი მმართველისათვის, არის შანტაჟის უპრეცედენტო ფორმა. ახლა კუკუდამალობანას დრო არ არის. რატომ უნდა ელოდოს ექსპერტიზას საზოგადოება? უნდა თქვა ყველაფერი თავისდროულად. წერილის ექსპერტიზამ თუ სხვა რამესაც მოჰფინა ნათელი, მთლად უკეთესი“, - აღნიშნა რომან გოცირიძემ.

ტელეკომპანია ”რუსთავი2“-ის ინფორმაციით, შს მინისტრის გიორგი გახარიას მიერ გაგზავნილი მუქარის წერილი ”თიბისი ბანკის“ დამფუძნებელ მამუკა ხაზარაძეს ამავე ბანკის თანადამფუძნებელმა ბადრი ჯაფარიძემ მიუტანა.

ტელეკომპანიისვე ინფორმაციით, ბადრი ჯაფარიძე გიორგი გახარიას მეზობელია. მათივე ცნობით, ერთ-ერთი ვერსიით, შეხვედრა შინაგან საქმეთა მინისტრის კაბინეტში შედგა, მეორე ვერსიით კი, ბადრი ჯაფარიძეს გახარიამ წერილი ავტოფარეხში გადასცა.

მამუკა ხაზარაძემ საკომიტეტო მოსმენაზე განაცხადა, რომ შინაგან საქმეთა მინისტრმა გიორგი გახარიამ წინასაარჩევნო პერიოდში მას მუქარის შემცველი წერილი გაუგზავნა. საქალაქო სასამართლოში დაკითხვის შემდეგ კი მამუკა ხაზარაძემ განაცხადა, რომ წერილის ორიგინალი ლონდონში, ექსპერტიზაზეა გაგზავნილი, ხოლო მისი ასლი პროკურატურას გადასცა.