დიპლომატიურ ენას თავის გამგები სჭირდება, ჩვენ შევეცდებით, რომ ელჩისგან წამოსული მესიჯები ადეკვატურად აღვიქვათ და გავაანალიზოთ, - ამის შესახებ დეპუტატმა ზვიად კვაჭანტირაძემ „ინტერპრესნიუსს" ევროკავშირის ელჩთან შეხვედრის დაწყებამდე განუცხადა. როგორც ზვიად კვაჭანტირაძემ აღნიშნა, მისთვის მნიშვნელოვანია, რომ ელჩს გააცნოს საკუთარი და თანამოაზრეების ხედვები.

„ჩვენი ამოცანაა, რომ დღეს გავაცნოთ ჩვენი ხედვები ქვყანაში მიმდინარე მოვლენების შესახებ, ჩვენი ხედვები კონკრეტულად მართლმსაჯულების სფეროში არსებული მდგომარეობის შესახებ და ჩვენი ამოცანების შესახებ იმ პრობლემების მოსაგვარებლად, რომელიც არსებობს ამ სისტემაში. ელჩმაც ინტერესი გამოთქვა, მას აქვს დიდი სურვილი, რომ მიიღოს ინფორმაცია ჩვენგან“, - განაცხადა კვაჭანტირაძემ.

შეგახსენებთ, ევროკავშირის ელჩს კარლ ჰარცელს დეპუტატები ეკა ბესელია, ლევან გოგიჩაიშვილი და ზვიად კვაჭანტირაძე ხვდებიან.