ამ ეტაპზე სამთავრობო გუნდის განახლების აუცილებლობას ვერ ვხედავ, თუმცა ეს პრემიერ-მინისტრის პრეროგატივაა, - ამის შესახებ ჟურნალისტებს პარლამენტის თავმჯდომარე ირაკლი კობახიძემ განუცხადა. მისი განცხადებით, მედია საშუალებებით პერმანენტულად ვრცელდება ინფორმაცია, რომ მინისტრთა კაბინეტის შემადგენლობაში ცვლილებებია, რაც ხშირად სიმართლეს არ შეესაბამება.

„მედიასაშუალებებით ხშირად ვრცელდება ინფორმაციები, თითქოს რომელიმე მინისტრი გადადგომას აპირებს, მაგრამ ჩვენ ვხედავთ, რომ ეს მინისტრები ინარჩუნებენ თანამდებობებს. სამთავრობო ცვლილებებთან დაკავშირებით ინფორმაცია მე პირადად არ გამაჩნია და აღვნიშნავ, რომ საკითხი მთლიანად პრემიერ-მინისტრის პრეროგატივაა. რაც შეეხება ჩემს შეხედულებას, მე ამ ეტაპზე სამთავრობო გუნდის განახლების აუცილებლობას ვერ ვხედავ“, - აღნიშნა ირაკლი კობახიძემ.

გავრცელებული ინფორმაციით, უახლოეს პერიოდში პრემიერ-მინისტრი მთავრობის ახალ შემადგენლობას წარადგენს. მედიის ინფორმაციით, ცვლილებები შეეხება ეკონომიკის, განათლების და იუსტიციის სამინისტროებს. თანამდებობის დატოვებასთან დაკავშირებით ინფორმაციას არც ადასტურებს და არც უარყოფს თეა წულუკიანი, რომლის განცხადებითაც, რიგი საკითხების გადაწყვეტას ელოდება და თუ მისი პოზიცია გაზიარებული არ იქნება, ის „გვერდზე გადგება“. მინისტრი თეა წულუკიანი გადასაწყვეტ საკითხს მედიასთან საუბრისას არ აკონკრეტებს.