მასწავლებელთა პროფესიულ გამოცდაზე რეგისტრაცია დღეს არ დაიწყება. ამის შესახებ შეფასების და გამოცდების ეროვნული ცენტრის ხელმძღვანელმა სოფო გორგოძემ ბრიფინგზე განაცხადა. როგორც გორგოძემ აღნიშნა, გამოცდაზე რეგისტრაცია მასწავლებელთა სახლის თხოვნით მოგვიანებით დაიწყება, თუმცა, მისივე განცხადებით, ეს არ ნიშნავს იმას, რომ გამოცდა არ იქნება.
"მასწავლებლების გამოცდისთვის რეგისტრაცია ცოტათი გადაიწევს, დღეს ეს რეგისტრაცია არ იწყება. ამის მიზეზი გახლავთ ის, რომ მასწავლებელთა პროფესიული განვითარების ცენტრი, როგორც ვიცით, გეგმავს ცვლილებებს სქემაში, შესაბამისად, როგორც კი ცვლილებები გამოცხადდება, პარალელურად დავიწყებთ რეგისტრაციის პროცესს. ეს არ ნიშნავს, რომ გამოცდები არ იქნება. თუ ჩვენ გადავწყვეტთ, რომ მასწავლებელთა გამოცდები ისევ ზაფხულში ჩავატაროთ, მაშინ რეგისტრაციის ვადები ცოტა შემჭიდროვდება. ეს დამოკიდებულია მასწავლებელთა პროფესიული განვითარების ცენტრის მოთხოვნაზე, ისინი დაგვიკვეთავენ გამოცდებს. მე როგორც ვიცი, გამოცდების ჩატარება ზაფხულში იგეგმება",- განაცხადა გორგოძემ.