მამუკა ბახტაძე - დარწმუნებული ვარ, რომ რეგიონში საქართველო იქნება როგორც არბიტრაჟის, ისე მედიაციის მიმართულებით ლიდერი

საქართველოში ახალი ინსტიტუტი და ახალი კულტურა ჩამოყალიბდება, - ამის შესახებ პრემიერ-მინისტრმა მამუკა ბახტაძემ მედიაციის ცენტრის შექმნასთან დაკავშირებით იუსტიციის სამინისტროს ახალი ინიციატივის შეფასებისას განაცხადა.

„მოგეხსენებათ, რომ დღეს ჩვენი მოქალაქეების უმრავლესობა სასამართლოსთან დაკავშირებულ მთავარ პრობლემად პროცესის ხანგრძლივობას მიიჩნევს, რასაც სასამართლოების გადატვირთულობაც განაპირობებს. რა თქმა უნდა, მედიაციის შემოღებით სასამართლოები გათავისუფლდებიან მცირე დავებისაგან და შესაბამისად, ეს ზოგადად აისახება, რომ საქართველოში დავების გადაჭრა მოხდება მაქსიმალურად მოკლე დროში. ამასთან ერთად, პირადად ჩემთვის აქვს კიდევ უფრო მეტი დატვირთვა. მოგეხსენებათ, რომ შარაშან ჩვენ ხელი მოვაწერეთ საერთაშორისო არბიტრაჟთან მემორანდუმს, რომლის მიხედვითაც, ჩვენ გვექნება შესაძლებლობა, თბილისი გახდეს რეგიონული ცენტრი არბიტრაჟის თვალსაზრისით. დღევანდელი ინიციატივით, არბიტრაჟს დაემატება მედიაცია. დარწმუნებული ვარ, რომ რეგიონში საქართველო იქნება როგორც არბიტრაჟის, ისე მედიაციის მიმართულებით ლიდერი და შესაბამისად, რეგიონალური ცენტრი, რომელიც ამავე დროს არის წინაპირობა, რომ საქართველო იყოს რეგიონში ეკონომიკური ცენტრი“, - განაცხადა ბახტაძემ.