წყარო, რაზე დაყრდნობითაც აკეთებენ ანგარიშის ავტორები ამ დასკვნებს, არის ისევ და ისევ კოაოლიცია და არასამთავრობო ორგანიზაციები, რომლებიც სასამართლო სისტემის მიმართ ერთი და იგივე პრეტენზიებს გამოთქვამენ, - ამის შესახებ იუსტიციის უმაღლესი საბჭოს მდივანმა გიორგი მიქაუტაძემ ჟურნალისტებს აშშ-ს სახელმწიფო დეპარტამენტის ანგარიშის შესახებ განუცხადა, სადაც საქართველოს სასამართლო სისტემის ხარვეზებზე არის საუბარი.
მიქაუტაძემ მაგალითად მოიყვანა სასამართლო საქმეთა განაწილების ელექტრონული პროგრამა, რომლის შესახებაც, მისი თქმით, არასამთავრობო ორგანიზაციებთან არაერთი შეხვედრა ჰქონდათ.
„ერთადერთი რაც შემიძლია ამ დასკვნის შესახებ ვთქვა, პირდაპირ არის დასკვნაში მითითებული წყარო რაზე დაყრდნობითაც აკეთებენ ანგარიშის ავტორები ამ დასკვნებს, წყარო არის ისევ და ისევ კოალიცია და არასამთავრობო ორგანიზაციები, რომლებიც, გასაგებია უკვე, სასამართლო სისტემის მიმართ გამოთქვამენ ერთი და იგივე პრეტენზიებს. შემიძლია კიდევ ერთხელ გავცე პასუხი იმ ბრალდებას რომელიც წარმოდგენილია. მაგალითად შემიძლია მოვიყვანო საქმეთა განაწილების ელექტრონული პროგრამა, რომელზეც ჩვენ არაერთი შეხვედრა ჩავატარეთ არასამთავრობო ორგანიზაციებთან და ყველა მათი პრეტენზია გავაბათილეთ მტკიცებულებებით, რომ ელექტრონული განაწილების პროგრამა მუშაობს ხარვეზების გარეშე და იქ ჩარევას ადგილი არ აქვს. თუმცა, ჩვენ მაინც გვესმის მათი მხრიდან ცრუ ფაქტებზე დაყრდნობით გავრცელებული ინფორმაციები", - განაცხადა მიქაუტაძემ.