მინდა დაგარწმუნოთ, რომ ამ დროისთვის უვიზო მიმოსვლის შეჩერების მექანიზმის ამოქმედება დღის წესრიგში არ დგას, - ამის შესახებ საგარეო საქმეთა მინისტრმა დავით ზალკალიანმა ევროპასთან ინტეგრაციისა და საგარეო ურთიერთობათა კომიტეტების ერთობლივ სხდომაზე მოხსენებით გამოსვლისას განაცხადა.

დავით ზალკალიანის თქმით, უვიზო მიმოსვლა არის ქვეყნის დიდი მონაპოვარი და აღნიშნულ საკითხთან დაკავშირებით არ უნდა არსებობდეს პოზიცია და ოპოზიცია. მისივე განმარტებით, ყველა უნდა გაერთიანდეს, რათა მოხდეს პრევენციული მექანიზმების კუთხით ზომების მიღება.

„ჩვენ ყველაფერს ვაკეთებთ, რომ ამ მონაპოვარის შენარჩუნება მოხდეს. ამაზე გვქონდა მსჯელობა ჩვენს ევროპელ პარტნიორებთან. მყისიერად ვრეაგირებთ ნებისმიერ წუხილზე, რომელიც მოდის ჩვენი ევროპელი პარტნიორების მხრიდან და ამაზე გვაქვს ადეკვატური ზომები მიღებული, როგორც საკანონმდებლო ინიციატივების კუთხით, ასევე საინფორმაციო კამპანიასთან დაკავშირებით. მინდა დაგარწმუნოთ, რომ ამ დროისთვის შეჩერების მექანიზმის ამოქმედება არ დგას დღის წესრიგში. მე ამას გეუბნებით ჩვენი ევროპელი პარტნიორების გადმოცემით, მაგრამ ეს იმას არ ნიშნავს, რომ ჩვენ მოვდუნდეთ. მინდა გთხოვოთ მხარდაჭერა, რადგანაც ეს არის თემა, რომელზეც არ უნდა არსებობდეს ოპოზიცია და ხელისუფლება“, - განაცხადა ზალკალიანმა.