მამაკაცი, რომელმაც უტრეხტის ტრამვაიში ადამიანები დაცხრილა, დაკავებულია

ნიდერლანდების პოლიციამ თურქი მამაკაცი დააკავა, რომელიც ქალაქ უტრეხტში ტრამვაიში მომხდარ სროლებშია ეჭვმიტანილი, რის შედეგადაც, ბოლო მონაცემებით, სამი ადამიანი გარდაიცვალა, ხუთი კი დაიჭრა. ამის შესახებ „როიტერი“ ქალაქის ხელისუფლებაზე დაყრდნობით იუწყება.

ეჭვმიტანილი პოლიციის მიერ იდენტიფიცირებულია როგორც 37 წლის გოქმენ თანისი.

„მთავარი ეჭვმიტანილი დაკავებულია“, - აღნშნულია ქალაქ უტრეხტის „ტვიტერის“ გვერდზე.

დღეს მომხდარის გამო, ქალაქში მაქსიმალურ ზღვრამდე გაიზარდა ტერორისტული საფრთხის დონე. პოლიციამ უსაფრთხოების ზომები გაამკაცრა აეროპორტებსა და სხვა სასიცოცხლოდ მნიშვნელოვან ობიექტებზე, ასევე მეჩეთებში.