გიორგი ქობულია  -  ჩვენ ყველას გვესმის, რომ საქართველოს ევროინტეგრაცია ჩვენი ქვეყნისა და რეგიონის კეთილდღეობის გარანტი და საუკეთესო გზა არის

საქართველო კვლავაც ერთგულია ევროინტეგრაციის. ეს არის ქართველი ხალხის შეუქცევადი და შეგნებული არჩევანი, რადგან ჩვენ ყველას გვესმის, რომ სწორედ ესაა ჩვენი ქვეყნისა და რეგიონის დემოკრატიის, მშვიდობისა და კეთილდღეობის გარანტი და საუკეთესო გზა, - განაცხადა საქართველოს ეკონომიკისა და მდგრადი განვითარების მინისტრმა გიორგი ქობულიამ ევროკავშირი-საქართველოს ბიზნესსაბჭოს შეხვედრაზე, რომელშიც ვაჭრობის საკითხებში ევროკომისარ სესილია მალმსტრომთან ერთად მიიღო მონაწილეობა.

გიორგი ქობულიამ და სესილიამ მალმსტრომმა დღეს ასევე სასტუმრო „ბილტმორში“ საქართველო - ევროკავშირის ბიზნესფორუმი გახსნეს. გიორგი ქობულიამ ევროკომისარს და საბჭოს წევრებს საქართველოს ეკონომიკური პოლიტიკის მთავარი ასპექტები და მიზნები გააცნო, მინისტრმა ხაზგასმით აღნიშნა, რომ საქართველო ევროკავშირთან ასოცირების პროცესს პოლიტიკური გაერთიანებისა და ეკონომიკური ინტეგრაციის ქვაკუთხედად მიიჩნევს და ქვეყნის მიზანი ამ ჩარჩოში წარმოდგენილი ყველა უპირატესობით მაქსიმალური სარგებლის მიღებაა.

„ასოცირების შესახებ შეთანხმების, მათ შორის DCFTA-ს ეფექტიანი განხორციელება, მთავრობის პრიორიტეტად რჩება. ჩვენ მზად ვართ კიდევ უფრო გავაძლიეროთ ჩვენი რეფორმების გატარება და მაქსიმალური ძალისხმევა მივმართოთ ყველა აღებული ვალდებულების წარმატებით განსახორციელებლად“, - აღნიშნა ეკონომიკისა და მდგრადი განვითარების მინისტრმა.

გიორგი ქობულიამ ასევე დეტალურად ისაუბრა საქართველოში არსებულ ბიზნეს-გარემოსა და ამ კონტექსტში აქცენტი ინვესტორებისთვის შექმნილ პირობებზე გააკეთა. მისი განცხადებით, მთავრობის ეკონომიკური ხედვა და ბიზნეს-კლიმატის მოდელი მთლიანად ეფუძნება პირდაპირი უცხოური ინვესტიციებისათვის საჭირო უსაფრთხო და პოლიტიკურ პროგნოზირებად გარემოსა და ტექნოლოგიებსა და ცოდნაზე ორიენტირებულ ეკონომიკას.

ამასთან, ეკონომიკის მინისტრმა ევროკომისარს ქვეყანაში მიმდინარე და დაგეგმილი რეფორმების შესახებ მიაწოდა ამომწურავი ინფორმაცია.

„რეფორმებთან ერთად, საქართველოს მთავრობამ პრიორიტეტულად მიიჩნია მცირე და საშუალო ბიზნესის განვითარება, რადგან მიგვაჩნია, რომ მცირე და საშუალო ბიზნესი არის კერძო სექტორის ზრდის მთავარი წყარო, რომელიც უზრუნველყოფს სამუშაო ადგილების შექმნასა და ინოვაციების განვითარებას“, - განაცხადა ქობულიამ.

ვაჭრობის საკითხებში ევროკომისარი სესილია მალმსტრომი საქართველოში ვიზიტის ფარგლებში დღეს შეხვედრებს მართვას საქართველოს მთავრობის წევრებთან.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს