არასდროს ვყოფილვარ და არც არასდროს ვიქნები ჯონ მაკკეინის ფანი, - ამის შესახებ აშშ-ს პრეზიდენტმა დონალდ ტრამპმა თეთრ სახლში ბრაზილიის პრეზიდენტთან შეხვედრის ფარგლებში ჟურნალისტებთან საუბრისას განაცხადა.

„ძალიან იმედგაცრუებული ვარ, რომ თავის დროზე მხარი არ დაუჭირა საყოველთაო ჯანდაცვის პროგრამის Obamacare-ის გაუქმებას. გახსოვთ ალბათ, რომ წლების განმავლობაში ამ პროგრამის გაუქმებით გამოდიოდა, თუმცა შემდეგ კი კენჭისყრაზე მხარი არ დაუჭირა. გარდა ამისა, არის სხვა მომენტები, რაც განაპირობებს ჩემს დამოკიდებულებას“, - განაცხადა აშშ-ს პრეზიდენტმა.

შეგახსენებთ, აქამდე ტელეარხმა Fox News-მა ინფორმაცია გაავრცელა, რომ ჯონ მაკკეინი ერთ-ერთი ის პოლიტიკოსი იყო, რომელმაც ბრიტანული დაზვერვის MI-6-ის ყოფილი აგენტისგან დონალდ ტრამპზე ფალსიფიცირებული დოსიე მიიღო და FBI-ს და ამერიკულ მედიას გადასცა.

აღნიშნული ინფორმაციის გავრცელების შემდეგ დონალდ ტრამპმა „ტვიტერზე“ დაწერა, რომ „ჯონ მაკკეინის რეპუტაციას ბევრი სხვა შავი ლაქა ჰქონდა“.