თუ თქვენ მოიყვანთ ერთ კანონსაც კი, რომელიც უკეთესი იყო ხალხისთვის და ჩვენ გავაფუჭეთ, მე ბოდიშს მოვიხდი და მხარს დაგიჭერთ, - ასე მიმართა „ქართული ოცნების“ წევრმა ზაქარია ქუცნაშვილმა ოპოზციის წევრებს, რომლებმაც იუსტიციის მინისტრის, თეა წულუკიანის საქმიანობა გააკრიტიკეს.

როგორც ქუცნაშვილმა აღნიშნა, ოპოზიციას მხოლოდ წყევლა-კრულვა ეხერხება.

„9 წელი ხომ იყავით, 9 კანონი მაინც დამისახელეთ, რომელიც ხალხისთვის იყო გაკეთებული. დამისახელეთ სფეროებში - შრომითი ურთიერთობის, სისხლის სამართლის, სამოქალაქო სფეროში. მოიყვანეთ ეს 9 კანონი, თქვენ რა გააკეთეთ ხალხისთვის და მერე ვილაპარაკოთ, რომ ეს ხალხი ცუდები არიან და მე დაგიჭერთ მხარს. მაგალითები არ გაქვთ, მხოლოდ წყევლა-კრულვა გეხერხებათ და სიძულვილი არ გაკლიათ. ამ გარემოში, სადაც არგუმენტები დავიწყებულია და წყევლა-კრულვაა წინ წამოსული, ძნელია ემოციების გარეშე საუბარი, მაგრამ ჩვენ ხალხი გვიყურებს და იმედი მაქვს, კანონებით შეფასდება თითოეული ჩვენგანის მუშაობა, კანონები იქნება ობიექტური მსაჯული იმისა, ვინ ვარგა და ვინ არ ვარგა“, - განაცხადა ქუცნაშვილმა.

ცნობისთვის, იუსტიციის მინისტრს თეა წულუკიანს პარლამენტში „მინისტრის საათის“ ფორმატში უკვე მეორე დღეა უსმენენ.