ქართული პრესის მიმოხილვა 23.03.2019

კახა კუკავა - “მანქანის ბაკიდან ბენზინის მოპარვა 90-იანი წლების მერე არ გამიგია”

ზაალ ანჯაფარიძე - “თავისუფალი დემოკრატების” ქმედება საკუთარი პოლიტიკური სისუსტის აღიარებაა”

* * *

კახა კუკავა - “მანქანის ბაკიდან ბენზინის მოპარვა 90-იანი წლების მერე არ გამიგია”

“ხელისუფლება კრიმინალს რომ ვერ აკონტროლებს, მე ამის დიდი სტატისტიკა არ მჭირდება... მანქანის ბაკიდან ბენზინის ამოღება, მე ნუცუბიძეზე ცხოვრობდი 90-იან წლებში, იმის მერე არ გამიგია. აგრეთვე არ გამიგია ამ ქუჩის “რაზბორკების”, ჩხუბის, დანის დარტყმის დროს პოლიცია არ მოსულიყოს - გვახსოვს დრო, როდესაც პოლიცია გამართულად მუშაობდა და დანის დარტყმა კი არა, ხმამაღალ საუბარზეც დროული რეაგირება ხდებოდა. აქვე უნდა დავაზუსტო, რომ წმინდა დანაშაულის სტატისტიკაზე მეტად იმატებს კრიმინალური მენტალიტეტი, რომელსაც არც ერთი სტატისტიკა არ ზომავს, რაც კიდევ უფრო საშიშია”, - აცხადებს “თავისუფლი საქართველოს” ლიდერი კახა კუკავა გაზეთ “ახალი თაობისთვის” მიცემულ ინტერვიუში, სათაურით “მანქანის ბაკიდან ბენზინის მოპარვა 90-იანი წლების მერე არ გამიგია” / კახა კუკავა: “დანაშაული იმიტომ იმატებს, რომ ერთიანი ხელისუფლება არ გვყავს”.

“შეიძლება წინა ხელისუფლების დროს ხდებოდა ათასი ქურდობა და ახლა ხდება ორი ათასი ქურდობა, მაგრამ სინამდვილეში უფრო მძიმედაა საქმე - ანუ ორჯერ კი არ გაიზარდა დანაშაული, არამედ ახალგაზრდებში ისევ ბრუნდება კრიმინალული მენტალობა, ეს ნიშნავს იმას, რომ უახლოეს წლებში იქნება კრიმინალური აფეთქება, თუ ეს ხელისუფლება დარჩა. რამდენიმე წლის წინ “ქუჩურად ბაზარს” ვერავინ ვერ ბედავდა, იმიტომ რომ კარგად იცოდა, რომ მაშინვე მოექცეოდა სამართალდამცავი ორგანოების ყურადღების ქვეშ. დღეს კი ეს კარგ ტონად ითვლება - იმიტომ რომ ვინც “ქუჩურად ბაზრობს”, ისინი სამართალდამცავი ორგანოების ფოკუსში კი არ ექცევიან, არამედ მმართველი პარტიების შტაბები ქირაობენ და ფულს უხდიან... ჩვენი პარტია აწარმოებს დამოუკიდებელ გამოძიებას რამდენიმე საქმეზე - როდესაც კრიმინალური ავტორიტეტები გაათავისუფლეს ციხიდან, მთავრობამ ბინა უქირავა თბილისის სხვადასხვა უბნებში. ამას დეტალურად ვიძიებთ და დავდებთ მასალებს”, - აღნიშნავს გამოცემის კორესპონდენტთან საუბრისას კახა კუკავა.

“საქმე მხოლოდ შსს სამინისტროში არ არის, პრობლება სხვა რამეშია - ერთიანი ხელისუფლება, როგორც ასეთი, საქართველოს არ ჰყავს. საქართველოში არსებობს ბიძინა ივანიშვილის ოჯახი, რომელიც არის ცალკე, ასევე პარლამენტში პატარ-პატარა ჯგუფები არის ცალკე - ეს ბოლო პერიოდში კარგად გამოჩნდა, და მთავრობაში ცალკეული მინისტრებიც არიან ყველა ცალ-ცალკე. ამ ადამიანებში მუდმივი და სისტემური ბმა, რომ ისინი არიან საქართველოს ხელისუფლება, არ არსებობს. არის თემატური ბმა, მაგალითად, როცა კონსტიტუციაა მისაღები, ივანიშვილი ამას ავალებს კობახიძეს, როცა არჩევნებია გასაყალბებელი, ამას ავალებს რომელიღაც სხვა მინისტრს, მაგრამ ასეთ სიტუაციაში დანაშაულთან ბრძოლა შეუძლებელია. შს სამინისტრო გიპასუხებთ და შესაძლოა სამართლიანადაც, რომ ყველაფერს აკეთებს კრიმინალთან დაკავშირებით რასაც შს სამინისტრო უნდა აკეთებდეს და სწორიც არის, მაგრამ როცა პრობლემა სისტემურია, იმას ერთი სამინისტრო ვერ მოუვლის”, - განაგრძობს რესპონდენტი.

“შს სამინისტრომ რამდენი კრიმინალიც არ უნდა დააპატიმროს, თუ არჩევნების წინ კობახიძე იტყვის გამოუშვით, 5 ათას ხმას გვიკეთებსო, აქ დამთავრდა კრიმინალთან ბრძოლა. ხელისუფლების ცვლილების გარდა აქედან გამოსავალი არ არსებობს. ამ ხელისუფლებამ თავისი თავი ამოწურა - დადგენილია, რომ 8 წელი არის მაქსიმუმი, როცა შეიძლება ხელისუფლებამ რაღაცა აკეთოს. “ქართულმა ოცნებამ” ამოწურა თავისი თავი, - ინტელექტუალური, მორალური, ფიზიკური - ყველაფერი ამოწურა, ძალიან რომ უნდოდეთ, ვეღარაფერს გამოასწორებენ. აღარ შეუძლიათ, მათ სიტყვას ფასი დაკარგული აქვს”, - დასძენს კუკავა და შეკითხვაზე - “ოცნება” აქტიურად ემზადება 2020 წლისთვის” - პასუხობს:

“საპარლამენტო არჩევნების მოგებისთვის შევარდნაძეც ემზადებოდა 2003 წელს. რესურსების ამოწურვას რომ არ აღიარებენ, რესურსების არქონის ერთ-ერთი დამადასტურებელია, თორემ ამას რომ ცნობიერებდნენ, იმას მაინც გააკეთებდნენ, რომ მშვიდობიანი წასვლისთვის მომზადებულიყვნენ. ამასაც რომ ვერ აცნობიერებენ, ამიტომაც მე ვფიქრობ, რომ 2020 წელს, სავარაუდოდ, ჩვენ რაღაც დრამატული მოვლენები არ აგვცდება”.

ზაალ ანჯაფარიძე - “თავისუფალი დემოკრატების” ქმედება საკუთარი პოლიტიკური სისუსტის აღიარებაა”

მე ვფიქრობ, “თავისუფალი დემოკრატების” და “ევროპული საქართველოს” ბლოკი მაინცდამაინც მომგებიანი არ იქნება იქიდან გამომდინარე, რომ საშუალო სტატისტიკური ამომრჩევლის თვალში “ევროპული საქართველო”, მიუხედავად იმისა, რომ “ნაციონალურ მოძრაობას” გამოეყო, მაინც “ნაციონალურ მოძრაობად” აღიქმება. იმიტომ, რომ საერთო წარსულის მქონენი არიან. ამომრჩევლის თვალში ისინი განიხილებიან იმ წარსულად, რაზეც ყველანი შეთანხმებულები ვართ და ვიცით რაც და იყო, და როგორც იყო”, - აცხადებს ანალიტიკოსი ზაალ ანჯაფარიძე გაზეთ “ახალი თაობისთვის” მიცემულ ინტერვიუში, სათაურით ზაალ ანჯაფარიძე: “თავისუფალი დემოკრატების” ქმედება საკუთარი პოლიტიკური სისუსტის აღიარებაა”.

“იქიდან გამომდინარე, რომ “თავისუფალი დემოკრატები” მთელი თავის არსებობის მანძილზე აცხადებდნენ, რომ ნებისმიერ პოლიტიკურ ძალასთან ითანამშრომლებდნენ “ნაცმოძრაობის” გარდა, ახლა აღმოაჩინეს, რომ არცთუ ცუდები ყოფილან ისინი. თურმე რასაც ისინი ხელისუფლებაში ყოფნის დროს აკეთებდნენ, მისაღები ყოფილა - მათი კომენტარები ამომრჩევლის თვალში დადებით პოზიციას არ დატოვებს. ზოგადად ამომრჩეველი აფასებს თანმიმდევრობას და ასეთ პოლიტიკურ ზიგზაგებს არ მიესალმება. აქედან გამომდინარე და კიდევ სხვა ფაქტორებიდან გამომდინარე, თუნდაც იქიდან როგორ მოხდა გირგვლიანის თემის შემობრუნება ორპარტიული გაერთიანების წარდგენილი კანდიდატის შალვა შავგულიძის მიერ, დადებით შთაბეჭდილებას არ დატოვებს. მოგეხსენებათ, შავგულიძე გირგვლიანის ოჯახის ადვოკატი იყო, უცებ გამოვიდა ისე, რომ დამნაშავე მხოლოდ მურუსიძეა და არა ის პოლიტიკური ძალა, რომელიც მოქმედებდა ამ ყველაფერზე და რომელზეც სტრასბურგის სასამართლო მიანიშნებდა, გამოდის, რომ თურმე არაფერ შუაში ყოფილა - ყოველ შემთხვევაში, ასეთ შთაბეჭდილება შეიძლებოდა გამოგვეტანა შავგულიძის ბოლო განცხადებიდან”, - აღნიშნავს გამოცემის კორესპონდენტთან საუბრისას ზაალ ანჯაფარიძე.

“აქედან გამომდინარე, ვფიქრობ, ეს გადაწყვეტილება “თავისუფალმა დემოკრატებმა” იმიტომ მიიღეს, რომ პოლიტიკური ცხოვრების ზედაპირზე იტივტივონ. მათი პარტიის პოლიტიკური აქციები სერიოზულად დაეცა მას შემდეგ, რაც პარტიის ცნობადი სახეები წავიდნენ. შთაბეჭდილება დამრჩა, რომ “ევროპულ საქართველოსთან” მიერთება მათთვის თავის გადარჩენის ერთგვარი საშუალებაა, სხვანაირად როგორ უნდა აიხსნას მათი გაერთიანება, - ერთიანდები სხვა პარტიასთან, როცა თავს არ მიიჩნევ თვითკმარ პოლიტიკურ ძალად, რომელსაც არ შეუძლია ელექტორატის მობილიზება იმისთვის, რომ მინიმუმ შეხვიდე პარლამენტში. მე ვთვლი, ეს არის საკუთარი პოლიტიკური სისუსტის აღიარება.”, - დაასკვნის რესპონდენტი და შეკითხვაზე - “ახსენეთ გირგვლიანის თემა, ხომ არ იქნებ ეს გამოყენებული ამ ბლოკის წინააღმდეგ ოპონენტების მხრიდან მუდმივად, ისევე როგორც “9 წელი?” - პასუხობს:

“რა თქმა უნდა, როდესაც პოლიტიკური დებატები იმართება, მუდმივად ამ თემას შეახსენებენ. გირგვლინის საკითხში მთლიანად სახელმწიფო და მაშინდელი პოლიტიკური ხელმძღვანელობა იყო ჩართული თავისი რესურსებით. ეს მხოლოდ მურუსუძეზე გადასატეხი ჯოხი არ არის. მურუსიძე იმართებოდა პოლიტიკური ხელმძღვანელობისგან და იმ დაკვეთას ასრულებდა, რაც მისგან მიიღო. რაც შეეხება “ევროპული საქართველოს” არგუმენტებს, რომ აანალიზებს წარსულ შეცდომებს და ზუსტად იმ გუნდთან შექმნა ბლოკი, ვინც მაშინდელ ხელისუფლებას პრინციპულად უპირისპირდებოდა, - არ ვიცი ვისთვის იქნება ეს დამაჯერებელი და ვისთვის არა, მაგრამ ჩემთვის ნამდვილად არ არის დამაჯერებელი. ჯერ ერთი შეცდომები მათ არ უღიარებიათ ღიად და მკაფიოდ! შეცდომების აღიარება არ ხდება ყოფილ ოპონენტთან ბლოკის შექმნით, არამედ ცოტა სხვანაირად - “ევროპულ საქართველოს” ეს არ ესწავლება, მათ ძალიან კარგად იციან, ეს როგორ ხდება.”

ავთანდილ წულაძე - მაკრონის, შოლცისა და ტუსკის შეხვედრის შემდეგ ცხადი გახდა, რომ უკრაინის იარაღის გარეშე დატოვების გეგმა ჩავარდა, ევროპისა და უკრაინა-რუსეთს შორის სამხედრო დაპირისპირება გაგრძელდება  და გაღრმავდება
„საქართველო მეცნიერების ქვეყანაა“ - აკადემიკოსი როინ მეტრეველი
ქართული პრესის მიმოხილვა 18.03.2024
Webster University Georgia-ს ფსიქოლოგიის საბაკალავრო პროგრამა დაემატა
Webster University Georgia-ს კომპიუტერული მეცნიერებების საბაკალავრო პროგრამა დაემატა