“ევროპული საქართველოს“ დეპუტატი გიგი წერეთელი ფიზიკური პირებისათვის ქონების გადასახადზე დაწესებული 40-ათას ლარიანი ზღვარის 60 ათას ლარამდე გაზრდის ინიციატივით გამოდის.
მოქმედი საგადასახადო კანონმდებლობით, ქონების გადასახადით ის ფიზიკური პირები იბეგრებიან, რომელთა მიერ წლის განმავლობაში მიღებული შემოსავლები 40 000 ლარს აღემატება. წერეთელი პარლამენტს ამ ზღვარის 60 ათასს ლარამდე გაზრდას სთავაზობს და მიზეზად ინფლაციის მაღალ ტემპსა და ლარის გაუფასურებას ასახელს.
“მოცემული კანონპროექტი მიმართულია სწორედ იმ პრობლემის გადაჭრისაკენ, რომელიც ეხება გაძვირებულ ფასებს, გაძვირებულ ცხოვრებას და შემოსვლების ზრდის დაბალ ტემპს. კანონპროექტის მიღება იმ ადამიანებისთვის ყოფის შემსუბუქებას ემსახურება, რომელთაც ცხოვრება გაუძვირდათ და ამავე დროს უწევდათ ქონების გადასახადის გადახდა, რადგან მათი შემოსავალი უცვლელი დარჩა ან მცირედით გაიზარდა და შეადგენს წელიწადში 40 ათას ლარზე მეტს და 60 ათას ლარზე ნაკლებს. კანონპროექტის მიღების შედეგად ის პირები, რომელთა წლიური შემოსავალი შეადგენს 40 ათას ლარზე მეტს და 60 ათას ლარზე ნაკლებს, ქონების გადასახადით აღარ დაიბეგრებიან. ზღვარი - 40 ათასი ლარი, რომელიც არსებობდა, 60 ათას ლარამდე გაიზრდება. ეს ათასობით ადამიანს საშუალებას მისცემს შეუმცირდეთ სამთავრობო ბეგარა და ამით ის ზარალი დააბალანსონ, რასაც გაუფასურებული ლარით, გაზრდილი საწარმოო ფასებით და მაღალი ინფლაციით ნახულობენ“, - ნათქვამია პროექტის განმარტებით ბარათში.
“საგადასახადო კოდექსში“ ცვლილებების პროექტი პარლამენტს 25 მარტის ბიუროს სხდომაზე წარედგინება.