პრეზიდენტის პრესსპიკერის, ხატია მოისწრაფიშვილის განცხადებით, იმისთვის, რომ შეწყალების კომისიამ იუსტიციის სამინისტროს ქვეშ იმუშაოს, საჭიროა ზოგიერთი საკანონმდებლო ცვლილების მიღება და სწორედ ამ თემაზე მიმდინარეობს მუშაობა.
ამის შესახებ მან დღეს გამართულ ბრიფინგზე განაცხადა და აღნიშნა, რომ ნებისმიერ შემთხვევაში, შეწყალებასთან დაკავშირებით საბოლოო გადაწყვეტილებას პრეზიდენტი მიიღებს.
"ეს საკითხი არის შეთანხმებული, შესწავლილი. ჩვენ არაერთხელ განვაცხადეთ, რომ მუშავდება კონცეფცია, რომლის მიხედვითაც კომისია იმუშავებს იუსტიციის სამინისტროს ქვეშ. ამის შესახებ იუსტიციის მინისტრმაც განაცხადა, თუმცა შეწყალება არის საქართველოს პრეზიდენტის დისკრეცია და ნებისმიერ შემთხვევაში, შეწყალებასთან დაკავშირებით საბოლოო გადაწყვეტილებას მიიღებს საქართველოს პრეზიდენტი", - განაცხადა პრესსპიკერმა.