ბექა ხახუბიას საქმეზე ბრალდებული პოლიციელების მიმართ სასამართლოს მიერ გამოტანილ განაჩენს ბრალდების მხარე არ ეთანხმება. პროკურორის განცხადებით, მას შემდეგ, რაც ბრალდების მხარე სასამართლოსგან დასაბუთებულ გადაწყვეტილებას ჩაიბარებს, აღნიშნულ განაჩენს სააპელაციო სასამართლოში გაასაჩივრებენ.

„დასრულდა საქმის განხილვა და მოსამართლემ გამოაცხადა განაჩენის სარეზოლუციო ნაწილი. ნუკრი ხაბელაშვილი, ათმეთაური ცნო უდანაშაულოდ.

გია სადაღაშვილი ცნობილი იქნა დამნაშავედ სისხლის სამართლის კოდექსის 116-ე მუხლის პირველი ნაწილით, რისთვისაც სასჯელის სახედ და ზომად განესაზღვრა 2 წლით და 6 თვით თავისუფლების აღკვეთა.

რაც შეეხება ზურაბ რუსიშვილს, იგი გამართლდა სსკ-ის 116-ე მუხლის პირველ ნაწილში, თუმცა დამნაშავედ იქნა ცნობილი 333-ე მუხლის პირველ ნაწილში და სასჯელის ზომად განესაზღვრა 1 წლით და 6 თვით თავისუფლების აღკვეთა.

ბრალდების მხარე არ ეთანხმება ამ განაჩენს და მას შემდეგ, რაც ჩავიბარებთ დასაბუთებულ გადაწყვეტილებას, გასაჩივრდება სააპელაციო სასამართლოში“, - განაცხადა პროკურორმა დავით ყაზარაშვილმა.

აღნიშნული საქმის განხილვა გორის რაიონულ სასამართლოში თითქმის 2 წლის განმავლობაში მიმდინარეობდა.

პარლამენტის წევრის, ფოთის მაჟორიტარი დეპუტატის, ირაკლი ხახუბიას ვაჟი, 21 წლის ბექა ხახუბია თბილისი-სენაკი-ლესელიძის საავტომობილო მაგისტრალის გორის მონაკვეთზე მდებარე გვირაბთან მომხდარი შემთხვევის დროს დაიღუპა.

2017 წლის 17 მაისს, ხახუბია აღნიშნულ მონაკვეთზე ავტომობილით მოძრაობდა, იგი არ დაემორჩილა საპატრულო პოლიციის მოთხოვნას, რის შემდეგაც, საპატრულო პოლიციის თანამშრომლებმა გორის გვირაბთან მისი შეჩერება სცადეს და გვირაბის გამოსასვლელთან გზა სატვირთო ავტომანქანით გადაკეტეს. ხახუბია სატვირთოს შეეჯახა, რა დროსაც გარდაიცვალა.