ერთი მხრივ, „ნაციონალური მოძრაობა“ ემიჯნება წარსულს, მეორე მხრივ, „ქართულმა ოცნებამ“ მომავალი უარყო, - ამის შესახებ „დაიცავი საქართველოს“ ლიდერმა დავით მაღრაძემ “პალიტრანიუსის“ გადაცემა „360 გრადუსში“ განაცხადა და აღნიშნა, რომ საზოგადოების იმ ნაწილს, რომელსაც ის წარმოადგენს, წარსულიც ახსოვს და მომავლისაც სჯერა.

„ჩვენ საზოგადოების წევრები წარსულაც ვაღიარებთ და მომავალსაც, ამიტომ ვამბობ, ჩემი აზრით უნდა გაჩნდეს ისეთი მოძრაობა, საიდანაც აღმოცენდება პოლიტიკური შემადგენელი, რომლისთვისაც ერთნაირად მნიშვნელოვანი იქნება როგორც მეხსიერება, ისე პერსპექტივაც“, - განაცხადა დავით მაღრაძემ .

მაღრაძის თქმით, ის პოლიტიკური შემადგენლობის ნაწილი ვერ გახდება, თუმცა „ბრძოლის“ პროცესში მონაწილეობის მიღების პერსპექტივა არ გამორიცხა.

გარდა ამისა, მოძრაობა „დაიცავი საქართველოს“ ლიდერი გადაცემის მსვლელობისას რამდენჯერმე შეეხო „ქართული ოცნების“ პოლიტიკურ კურსს და ხაზგასმით აღნიშნა, რომ დღეს „ქართული ოცნება“ „ნაციონალურ მოძრაობას“ ემსგავსება.

„ქართულ ოცნებას“ და ნაციონალურ მოძრაობას“ ერთი და იგივე საყრდენები ჰყავს. „ქართულმა ოცნებამ“ ის საყრდენი მოძებნა, რაც ადრე „ნაციონალებს“ ჰქონდათ. სხვათა შორის, არავის მოუხვევია ისინი „ოცნებისთვის“, თავად იპოვეს და გემოსაც ატანენ ამ ყველაფერს. ეტყობათ კიდეც, უხარიათ, რომ ამ საყრდენებს მიაგნეს. ღმერთმა მშვიდობაში მოახმაროთ, თუმცა სად წავლენ, დაინახავს საზოგადოება. ერთი რამ მინდა აღვნიშნო, მე მოქალაქე ბიძინა ივანიშვილსა და მიხეილ სააკაშვილს შორის ტოლობის ნიშანს არ ვაყენებ. მე ვამბობ, მმართველ პოლიტიკურ ძალასა და „ნაციონალურ მოძრაობას“ შორის წაიშალა ზღვარი, სადემარკაციო ხაზი წაიშალა უზნეობის თვალსაზრისით. აი, ამ პოლიტიკურ ძალას, რომელსაც ივანიშვილი ხელმძღვანელობს, წაეშალა ზღვარი იმ პოლიტიკურ ძალასთან, რომელსაც ხელმძღვანელობდა სააკაშვილი“, - განაცხადა დავით მაღრაძემ.

იხილეთ ვიდეო