რუსეთის საგარეო უწყება - თვითმარქვია პრეზიდენტის პროვოკაციული აქტიურობა ვენესუელას სახელმწიფოებრიობას ძირს უთხრის

რუსეთი ვენესუელას ოპოზიციის ლიდერის ხუან გუაიდოს ქმედებებს პროვოკაციულად მიიჩნევს, რაც ქვეყნის სახელმწიფოებრიობას ძირს უთხრის, - ამის შესახებ რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ განაცხადა.

მისი თქმით, ხელი უნდა შეუწყონ ვენესუელაში საკონსტიტუციო წესრიგის აღდგენის გადაწყვეტილებების ძებნას.

„პირველ რიგში საუბარია იმაზე, რომ უნდა შეწყდეს თვითმარქვია პრეზიდენტის პროვოკაციული აქტიურობა, რომელიც ვენესუელას სახელმწიფოებრიობისთვის ძირის გამოთხრითაა დაკავებული“, - განაცხადა რუსეთის საგარეო უწყების ოფიციალურმა წარმომადგენელმა.

ზახაროვამ ასევე ხაზგასმით აღნიშნა, რომ ბოლო უნდა მოეღოს კანონიერად არჩეული პრეზიდენტის დევნას.

შეგახსენებთ, აქამდე ვენესუელას დროებითმა პრეზიდენტმა ხუან გუაიდომ განაცხადა, რომ 6 აპრილს ოპოზიცია ტაქტიკური ქმედებების განხორციელებას დაიწყებს, რომლის მიზანია ნიკოლას მადუროს დამხობა.