გოცირიძე-დიდუბის ხიდის ავარიულობა არ დადგენილა, - ამის შესახებ ჟურნალისტებს თბილისის მერის მოადგილემ, ირაკლი ხმალაძემ განუცხადა.
თბილისის მერის მოადგილის განცხადებით, მეტროს ხაზს პერმანენტულად უტარდება შემოწმება და უსაფრთხოების კუთხით პრობლემები არ ფიქსირდება.
რაც შეეხება კითხვას, თუ რატომ დადის მეტროს შემადგენლობა აღნიშნულ მონაკვეთზე შენელებულად, მერის მოადგილე აღნიშნავს, რომ აღნიშნულ მონაკვეთზე საკომუნიკაციო ქსელების პრობლემაა და შესაბამისი სამუშაოები მიმდინარეობს.
"ამ ხიდის და მეტროს სხვა ინფრასტრუქტურის შემოწმება და ექსპერტიზა პერიოდულად ხდება. უშუალოდ ამ ხიდთან დაკავშირებით კომპეტენტური და კვალიფიციური ექსპერტების მიერ შემოწმება დაახლოებით 2 თვის წინ მოხდა, სადაც ამ ხიდზე ავარიული ფაქტორები არ დადგენილა. თუმცა იქ გარკვეული საკომუნიკაციო ქსელების პრობლემაა. სანიაღვრე და წყალარინების ქსელის. ამ ეტაპზე მეტროს მატარებლის მიერ ამ მონაკვეთზე სიჩქარის შენელება ხდება. თუმცა ვიბრაციები და ბურჯების ჯდომის ნორმები აბსოლუტურად ნორმაშია. ეს კვალიფიციური ექსპერტების მიერ დადასტურებულია. შესაბამისად, ამ ხიდის ავარიულობას ვერ დავადასტურებ," - განაცხადა ირაკლი ხმალაძემ.