ჯანდაცვის მინისტრის მოადგილე თამარ ბარკალაია აცხადებს, რომ სოციალური მუშაკების მოთხოვნა იურისტებისა და ფსიქოლოგების დამატებასთან დაკავშირებით დაკმაყოფილდება და სოციალური მომსახურების სააგენტოს 12 იურისტი დაემატება.

მინისტრის მოადგილის განმარტებით, სოციალური მუშაკების ერთ-ერთი მოთხოვნა იურისტების და ფსიქოლოგების დამატება იყო. რაც შეეხება ფსიქოლოგს, ფსიქოლოგთან დაკავშირებით, უკვე დამატებულია 1 ვაკანსია.

„მოგეხსენებათ რეორგანიზაცია არის გამოცხადებული სოციალური მომსახურების სააგენტოში და ჩვენ მზად ვართ, მივიღოთ შემოთავაზებები სად და რომელ რეგიონში იქნება საჭიროება ფსიქოლოგის დამატების. სოციალური მუშაკები მოგვაწვდიან იმ რეგიონების ჩამონათვალს, სადაც ფსიქოლოგი არის საჭირო“, - განაცხადა ბარკალაიამ ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე სიტყვით გამოსვლისას.

მისივე თქმით, სამინისტროს აქვს შესაძლებლობა, რომ რეორგანიზაციის ფარგლებში დამატებით ფსიქოლოგების შტატები რეგიონებსა და თბილისში აპრილის ბოლომდე შეიქმნას.