არარელევანტური და არასწორია კითხვა იმის თაობაზე, გავითვალისწინებთ თუ არა ვენეციის კომისიის ყველა რეკომენდაციას - ასეთი რამ ბუნებაში არ ხდება, - ამის შესახებ ჟურნალისტებს ფრაქცია „ქართული ოცნების“ თავმჯდომარემ მამუკა მდინარაძემ განუცხადა.
მდინარაძემ ხაზგასმით აღნიშნა, რომ უზენაესი სასამართლოს მოსამართლეების არჩევის წესთან დაკავშირებით მომზადებულ კანონპროექტზე მმართველი გუნდი ყველა სამართლებრივად ლოგიკურ და კონსტიტუციასთან შესაბამის რეკომენდაციას გაითვალისწინებს.
ამ კონტექსტში დღეს მდინარაძემ ისიც გაიხსენა, რომ საკონსტიტუციო რეფორმის ფარგლებში ვენეციის კომისიის რეკომენდაცია იყო, პარლამენტი საერთოდ არ ჩარეულიყო უზენაესი სასამართლოს მოსამართლეების არჩევის პროცესში, თუმცა მმართველმა გუნდმა ეს რეკომენდაცია არ გაითვალისწინა, რაც სწორი გადაწყვეტილება იყო.
„უხერხულია კითხვა იმის შესახებ, გავითვალისწინებთ თუ არა ვენეციის კომისიის ყველა რეკომენდაციას. ასეთი დათქმა თანამედროვე მსოფლიოში არ არსებობს. ვენეციის კომისია არის ძალიან ავტორიტეტული ორგანიზაცია, რომელიც რეკომენდაციებს გასცემს და პასუხისმგებლიანი სახელმწიფოები ამ რეკომენდაციების დიდ ნაწილს იზიარებენ“, - აღნიშნა მამუკა მდინარაძემ.