შეფასების და გამოცდების ეროვნულმა ცენტრმა გამოცდებისთვის რეგისტრაციის პროცესში ხშირად დაშვებული შეცდომები გამოავლინა. შეფასების და გამოცდების ეროვნული ცენტრის ხელმძღვანელმა სოფიო გორგოძემ აბიტურიენტებს მოუწოდა, გაითვალისწინონ შეცდომები და რეგისტრაციის პირველი ეტაპი და 3 აპრილის 18:00 საათამდე დროულად დარეგისტრირდნენ.

„შეფასების და გამოცდების ცხელი ხაზის თანამშრომლებმა გააკეთეს ძალიან კარგი შეჯამება თუ რა შეცდომებს უშვებენ აბიტურიენტები რეგისტრაციის პროცესში და რატომ ვერ რეგისტრირდებიან. რეგისტრაცია ვერ მიჰყავთ ბოლომდე რადგან ავიწყდებათ ბმულის მონიშვნა“, - ვეთანხმები რეგისტრაციის წესებს", მომხმარებლის სახელში ელექტრონული ფოსტის ნაცვლად უთითებენ სახელსა და გვარს, ასეთი შეცდომა ძალიან ბევრი ფიქსირდება; იმ აბიტურიენტებს, რომლებიც სახელოვნებო ან სასპორტო პროგრამებზე აბარებენ ავიწყდებათ, რომ აირჩიონ შემოქმედებითი ტური, რის გარეშეც რეგისტრაციას ვერ გაივლიან. ასევე ხშირია პროგრამების კოდების არასწორად მითითება; საერთო სამაგისტრო გამოცდებისთვის შეცდომით ირჩევენ ტესტის ტიპს; ასევე იწყებენ რეგისტრაციას თანხის გადახდის გარეშე. კიდევ ერთხელ ვამბობ, ერთ საგანში თუ მაინც აქვთ თანხა გადახდილი, შეუძლიათ გაიარონ რეგისტრაცია 3 აპრილამდე აუცილებლად და 3 აპრილის შემდეგ დაამატონ სხვა საგნები. ასევე, ფიქსირდება თანხის არასწორად ჩარიცხვის შემთხვევები, მაგალითად, ერთიანი ეროვნული გამოცდების ნაცვლად რიცხავენ საერთო სამაგისტრო გამოცდაზე თანხას და ასეთი შეცდომების გამო რეგისტრაციისას პრობლემები ექმნებათ. ვთხოვთ აბიტურიენტებს, გაითვალისწინონ ეს შეცდომები და დროულად დარეგისტირდნენ გამოცდებისთვის",- განაცხადა გორგოძემ.

ერთიანი ეროვნული გამოცდებისთვის რეგისტრაცია 25 300-ზე მეტმა აბიტურიენტმა გაიარა. სტუდენტთა საგრანტო კონკურსში მონაწილეობის სურვილი 1100-ზე მეტმა სტუდენტმა გამოთქვა, ხოლო საერთო სამაგისტრო გამოცდებისთვის ელექტრონული განაცხადი 4000-მდე აპლიკანტმა შეავსო.

რეგისტრაციის მომდევნო ეტაპი 7 მაისს, 18:00 საათზე სრულდება.