სექტემბრის ბოლოს კასპში უეფას მეორე კატეგორიის სტანდარტების სტადიონი დაიწყებს ფუნქციონირებას. პრემიერის პრესსამსახურის ინფორმაციით, სამშენებლო სამუშაოები საქართველოს პრემიერ-მინისტრმა მამუკა ბახტაძემ ფეხბურთის ფედერაციის პრეზიდენტთან ერთად დაათვალიერა.

მთავრობის მეთაურმა აღნიშნა, რომ სპორტის განვითარების ხელშეწყობა და ამ მიმართულებით ახალგაზრდების წახალისება მნიშნელოვანი პრიორიტეტია, შესაბამისად მსგავსი პროექტების განხორციელება მთელი ქვეყნის მასშტაბით იგეგმება.

კასპის უეფას მეორე კატეგორიის სტანდარტების სტადიონი, ხელოვნურსაფარიანი მოედნით, 520 მაყურებელზე იქნება გათვლილი. ამასთან ერთად, რეკონსტრუქცია ჩაუტარდება ცენტრალურ საფეხბურთო მოედანს, საფეხბურთო სკოლას და სავარჯიშო მოედანს. პროექტის ღირებულება 2,5 მილიონი ლარია.

პრემიერ-მინისტრთან ერთად სტადიონზე რეგიონის გუბერნატორი, მაჟორიტარი დეპუტატი და განათლების, მეცნიერების, კულტურისა და სპორტის მოადგილე იმყოფებოდნენ.

მთავრობის მეთაური კასპის სპორტულ სკოლასაც სტუმრობდა, სადაც ძიუდოსა და კალათბურთის დარბაზები დაათვალიერა და სპორტსმენებს გაესაუბრა.