ვფიქრობ, საჭიროა, პირდაპირი საუბარი საზოგადოებასთან, - ამის შესახებ „ქართული ოცნების“ წევრმა, ნუკრი ქანთარიამ „პალიტრანიუსის“ გადაცემაში „7VS1“ განაცხადა.

როგორც მან განმარტა, საზოგადოებაში არსებული იმედგაცრუება ბუნებრივია და ახლა ხალხთან გასვლა, მათთან საუბარი და დაპირებების შესრულებაა აუცილებელი.

„ბიძინა ივანიშვილი ხიბულაში რომ აღმოჩნდა, ასე ნუ ვიტყვით, რომ კამპანია არის დაწყებული. 31 მარტს არის 80 წლისთავი პირველი პრეზიდენტის, ვფქირობ, იქ ჩასვლა ამას უფრო უკავშირდება. თუმცა, იმასაც ვიტყვი, რომ საჭიროა, პირდაპირ ხალხში გასვლა. ამაზე გვქონდა კიდეც საუბარი, ყოველგვარი წერილების გარეშე, პირდაპირი კონტაქტია საჭირო საზოგადოებასთან“, - განაცხადა ქანთარიამ.

ჟურნალისტის კითხვაზე, საზოგადოებასთან შეხვედრებზე ბიძინა ივანიშვილი ივლის თუ პარტიის სხვა წევრები, ქანთარიამ ასე უპასუხა:

„ბიძინა ივანიშვილი ივლის ალბათ, უნდა იაროს ყველამ, ვისაც ერთი-ორი სიტყვა დაეჯერება. ეს გამოჩნდება სწორედ შეხვედრების დროს. ასე ნუ გავიგებთ, რომ ყოველ პარასკევს ბიძინა ივანიშვილი უნდა ვიხილოთ ან მთაში, ან ბარში, ან სადმე. არ მგონია, ასე იყოს. ვფიქრობ, საჭიროა, პირდაპირი საუბარი საზოგადოებასთან. გარკვეული პერიოდის შემდეგ, ხდება რაღაც იმედგაცრუება. ბუნებრივია, საჭიროა, მაქსიმალურად ახსნა-განმარტება და კიდევ მოსმენა საზოგადოების, ასევე შესრულება დაპირების. მეც ამ მოლოდინის რეჟიმში ვარ და მუდმივად ვახსენებ, რომ ცვლილებებია საჭირო. ეს ცვლილებები მე კი არ მჭირდება პირადად, არამედ, რეალობას და დროს სჭირდება. ვფიქრობ, რომ დალაგდება სიტუაცია. ირაკლი ღარიბაშვილის მოსვლა, მგონია, ამის ერთ-ერთი საფუძველიც“, - განაცხადა ქანთარიამ.

იხილეთ ვიდეო