ევროკავშირის პროექტის „სახელმწიფო აუდიტის სამსახურის ინსტიტუციური გაძლიერება" ფარგლებში, სახელმწიფო აუდიტის სამსახურისა და პარლამენტის საფინანსო-საბიუჯეტო კომიტეტის დელეგაცია სამუშაო ვიზიტით ლატვიასა და ფინეთში გაემგზავრა.

როგორც „ინტერპრესნიუსს“ სახელმწიფო აუდიტის სამსახურიდან აცნობეს, დელეგაციის წევრები შეხვედრებს ლატვიის სახელმწიფო აუდიტის სამსახურში გამართავენ, სადაც სტრატეგიული დაგეგმვის, ხარისხის უზრუნველყოფის და შემოსავლების აუდიტთან დაკავშირებულ საკითხებს განიხილავენ. საქართველოს დელეგაციის წევრები ასევე ლატვიის პარლამენტს ეწვევიან, სადაც უმაღლესი აუდიტორული ინსტიტუციისა და საკანონმდებლო ორგანოების წარმომადგენლები თანამშრომლობის გამოცდილებებს გაუზიარებენ ერთმანეთს.

მათივე ინფორმაციით, ლატვიიდან საქართველოს დელეგაცია გაემგზავრება ჰელსინკიში, სადაც შეხვედრებს გამართავს ფინეთის სახელმწიფო აუდიტის სამსახურში. ფინეთისა და საქართველოს გენერალური აუდიტორები ტუტი ილი ვიიკარი და ირაკლი მექვაბიშვილი ურთიერთგაგების მემორანდუმს გააფორმებენ.

საქართველოსა და ფინეთის აუდიტორული უწყებების თანამშრომლობისა და გამოცდილების გაზიარების იდეა მარტის დასაწყისში, იერუსალიმში გამართულ EUROSAI-ASOSAI -ს კონფერენციაზე გაჩნდა. დელეგაციას პარლამენტის მხრიდან საფინანსო საბიუჯეტო კომიტეტის თავმჯდომარე ირაკლი კოვზანაძე, სახელმწიფო აუდიტის სამსახურიდან გენერალური აუდიტორი ირაკლი მექვაბიშვილი ხელმძღვანელობენ.