აზიურ ფაროსანასთან ბრძოლის სახელმწიფო პროგრამასა და ფუტკრის მოვლისა და დაცვის ღონიძიებებზე მავნებელთან ბრძოლის საკოორდინაციო ცენტრის ხელმძღვანელმა ლაშა შალამბერიძემ მეფუტკრე ფერმერებს ინფორმაცია ქუთაისში, საქართველოს სავაჭრო-სამრეწველო პალატის ორგანიზებით, მეფუტკრეებთან გამართულ შეხვედრაზე მიაწოდა. ამის შესახებ „ინტერპრესნიუსს“ სურსათის ეროვნული სააგენტოდან აცნობეს.

მათი ინფორმაციით, მეფუტკრეთა ინტერესების გათვალისწინებით, იმ ტერიტორიებზე, სადაც საფუტკრეებია განთავსებული, თერმული ნისლის ტექნოლოგიით დამუშავება მოხდება საღამოს საათებში, როცა ფუტკარი დაბინავებულია. მუნიციპალიტეტებში შექმნილი სპეციალური სამუშაო ჯგუფები უზრუნველყოფენ მეფუტკრე ფერმერების აღრიცხვას და დაზუსტებულ ინფორმაციას მიაწვდიან მავნებელთან ბრძოლის საკოორდინაციო მართვის ცენტრს. იმ სოფლებში, სადაც ფუტკრის ოჯახების მაღალი კონცენტრაციაა, შეიქმნება ბუფერული ზონები და დამონტაჟდება „მოიზიდე და გაანადგურე“ სადგურები.

„წამლობის დაწყების შესახებ შეტყობინება მეფუტკრეებთან 24 საათით ადრე გაიგზავნება; ასევე, შემუშავდება სისტემა, რომლის მიხედვითაც გზის მიმდებარე ტერიტორიაზე განთავსდება სპეციალური აღმნიშვნელი ფუტკრის ადგილმდებარეობის შესახებ.

მეფუტკრე ფერმერებმა მეფუტკრეობის განვითარების ახელმწიფო სტრატეგია და მავნებელთან ბრძოლის პროცესში კოორდინირებული მიდგომა დადებითად შეაფასეს და აღნიშნეს, რომ დაგეგმილი დაცვითი ღონისძიებები მინიმუმამდე დაიყვანს ფუტკრის დაზიანების რისკს.

ფაროსანას საწინააღმდეგო ღონისძიებების შესახებ ინფორმაციის მისაღებად, მეფუტკრეებს შესაძლებლობა აქვთ, გაიარონ SMS რეგისტრაცია საკოორდინაციო მართვის ცენტრის ოფიციალურ ვებგვერდზე - farosana.ge და გზავნილების მეშვეობით მიიღონ დეტალური ინფორმაცია ღონისძიებების დაწყებისა და განხორციელების ვადებზე.

შეხვედრას ესრებოდნენ მეფუტკრეები დასავლეთ საქართველოს ყველა რეგიონიდან“, - აღნიშნულია სურსათის ეროვნული სააგენტოს მიერ გავრცელებულ ინფორმაციაში.