საპროტესტო აქციის ორგანიზატორებმა დაშლის გადაწყვეტილება მიიღეს. ამის შესახებ ჟურნალისტებს "სოლიდარობის ქსელის" თავმჯდომარემ, სოფო ჯაფარიძემ განუცხადა.
"ახლა მორჩა აქცია და მივდივართ. ჩვენი მოთხოვნა რაც იყო, ის დღეს არ შესრულდა. კახა კალაძე არ მოვიდა, მთავრობამ ყურადღება არ მოგვაქცია და ეს სამწუხაროა. დღეს ღამე ვაპირებთ, დავგეგმოთ, ზუსტად როგორ უნდა გავაგრძელოთ მოქმედება. მზად ვართ გაგრძელებისთვის, ბევრი ადამიანი, ვინც აქ არის, ან აქტივისტია, ან პროფკავშირის წევრია, მოქალაქე, ვინც ხშირად უსმენს, რა ხდება ქვეყანასა და "ფეისბუქზე" და გადაწყვეტილება მიიღო, რომ აღარ იქნება მსხვერპლი, რადგან უკვე აღარ შეგვიძლია ასე. განცხადებას სოციალური ქსელით გავავრცელებთ. სამომავლო გეგმებზე იქ დავწერთ. ჩვენ გვინდა, ახალი და ჯანსაღი მოძრაობა შევქმნათ, რომელიც არ იქნება მხოლოდ რამდენიმე ადამიანის გარშემო. მთავარია, მუშებზე და მშრომელებზე ვიზრუნოთ, შრომის უფლებები კი არ არის დაცული ქვეყანაში. პოლიტიკა "თუ არ მოგწონს, წადი", უნდა მორჩეს", - აღნიშნა ჯაფარიძემ.