დეპუტატმა ბექა ოდიშარიამ უკან გაიწვია საკუთარი საკანონმდებლო ინიციატივა, რომლითაც საქართველოში საზღვარგარეთის საპატიო კონსულების ავტომობილებზე დიპლომატიური ნომრების გაცემა იყო შესაძლებელი.

“საჯარო სამართლის იურიდიული პირის – საქართველოს შინაგან საქმეთა სამინისტროს მომსახურების სააგენტოს მიერ გაწეული მომსახურებისათვის დაწესებული საფასურისა და ვადების შესახებ’’ კანონში ცვლილები პარლამენტის ბიუროს ინიცირებისთვის გუშინდელ სხდომაზე წარედგინა, თუმცა დღეს ავტორმა პროექტი უკან გაიწვია. როგორ ბიუროს სხდომაზე ითქვა, ამის მიზეზი პროექტის შემდგომი გადამუშავებაა.

დიასპორისა და კავკასიის საკითხთა კომიტეტის ხელმძღვანელმა ბექა ოდიშარიამ პარლამენტს საკანონმდებლო ცვლილებები შესთავაზა, რომლის მიხედვით, საქართველოში საზღვარგარეთის სახელმწიფოს საპატიო კონსულის ავტომობილისათვის დიპლომატიური სანომრე ნიშნის გაცემა იყო შესაძლებელი.

კანონის მოქმედი რედაქციით, არ არის გათვალისწინებული საქართველოში საპატიო კონსულისათვის, საერთაშორისო სამართლით მინიჭებული პრივილეგიები და იმუნიტეტი. საპატიო კონსულები დღეს ჩვეულებრივი სანომრე ნიშნებით სარგებლობენ.