დეპუტატი თინა ბოკუჩავა პარლამენტის პლენარულ სხდომაზე ნატო-ს გენერალური მდივნის იენს სტოლტენბერგის მიერ გაჟღერებულ მესიჯებს შეეხო და აღნიშნა, რომ „ქართულ ოცნებას“ ყველაზე მნიშვნელოვანი მესიჯი ყურადღების მიღმა დარჩა.
„სტოლტენბერგმა აღნიშნა, რომ არჩევნების ჩატარების მთავარი არსი ისაა, რომ ხალხი წყვეტს ვინ იქნება მთავრობაში, ხალხს აქვს უფლება შეცვალოს მთავრობა, ხელისუფლების მშვიდობიან გადაბარებას არსებითი მნიშვნელობა აქვს საზოგადოებისთვის. აი ეს გზავნილი ყურად უნდა იღოს „ქართულმა ოცნებამ“, რადგან წინა არჩევნებზე ბიძინა ივანიშვილმა ხალხს წაართვა ხელისუფლების მშვიდობიანი გადაბარების შესაძლებლობა, რადგან საპრეზიდენტო არჩევნებზე მან ჩაატარა სპეცოპერაცია, მან არჩევნები იყიდა და ადამიანებს წაართვა ყველაზე ძვირფასი დემოკრატიულ საზოგადოებაში: საკუთარი ხმა, საკუთარი არჩევანის გაკეთების შესაძლებლობა და ამით საფრთხის წინაშე დააყენა ჩვენი ქვეყნის დემოკრატიული განვითარების შესაძლებლობა. ნატო-ს გენერალური მდივნის გამოსვლიდან ჩანს, რომ საფრთხის ქვეშ დააყენა არა მხოლოდ დემოკრატია, არამედ უსაფრთხოებაც, რადგან ასეთი არჩევნები პირდაპირ საფრთხეს უქმნის ჩვენს ევროატლანტიკურ არჩევანს, იმ არჩევანს, რომელიც საქართველოს საზოგადოებამ გააკეთა და მიზანს, რომელსაც ჩვენ აუცილებლად მივაღწევთ, მაგრამ არა ამ ხელისუფლების პირობებში და ეს უნდა გაეგო „ქართულ ოცნებას“, - განაცხადა თინა ბოკუჩავამ.