გიორგი კანდელაკი უმრავლესობას - კანონიდან სიტყვა “ლიბერალურის“ ამოღებამ კარგად წარმოაჩინა “ქართული ოცნების“ ფარისევლობა

კანონიდან სიტყვის “ლიბერალური“ ამოღებამ ძალიან კარგად წარმოაჩინა “ქართული ოცნების“ ფარისევლობა - თან ვითომ 1991 წლის 31 მარტის რეფერენდუმს აღნიშნავთ, თან იმათ იდეოლოგიურ ხაზს აგრძელებთ, ვინც საქართველოს თავისუფლებას უპირისპირდებოდა, - აღნიშნული განცხადება პარლამენტის პლენარულ სხდომაზე, მმართველი გუნდის მისამართით ოპოზიციონერმა დეპუტატმა გიორგი კანდელაკმა გააკეთა.

კანდელაკმა სესიაზე გაზეთ “პრავდას“ 1936 წლის ნომერი წარადგინა, სადაც გამოქვეყებულია მასალა სათაურით - “დამპალი ლიბერალები - მტრების დამქაშები“. როგორც კანდელაკმა განაცხადა, აღნიშნული სათაური და გაზეთი “პრავდა“ “ქართული ოცნების“ ყველაზე კარგი სიმბოლოა.

“ქართული ოცნების“ 6-წლიანი მოღვაწეობის მნიშვნელოვანი სიმბოლოა “ზოგადი განთლების შესახებ კანონიდან სიტყვის - “ლიბერალური” ამოღება. თავი რომ დავანებოთ იმას, რომ ამ ნაბიჯით თქვენ ჩვენს ქვეყანაში ლეგიტიმაცია მიეცით რუსულ საინფორმაციო ომს, რომლის ერთ-ერთი მთავარი პოსტულატის თანახმად, დასავლური, ლიბერალ-დემოკრატიული იდეები წარმოადგენს საფრთხეს და გადაგვაჯიშებს. თქვენ ამ ნაბიჯით დაუპირისპირდით ილია ჭავჭავაძის მემკვიდრეობას, რომელიც დიახაც, იყო ლიბერალ-დემოკრატრიული იდეების მედროშე ჩვენი ქვეყნის ისტორიასა და პოლიტიკურ აზროვნებაში ამ იდეების დამამკვიდრებელი“, - განაცხადა გიორგი კანდელაკმა.

განათლებისა და მეცნიერების საპარლამენტო კომიტეტმა გუშინ გამართულ სხდომაზე დეპუტატების ნუკრი ქანთარიასა და გენადი მარგველაშვილის საკანონმდებლო ინიციატივა განიხილა, რომელიც “ზოგადი განათლების შესახებ” კანონიდან სიტყვის - “ლიბერალური” ამოღებას ითვალისწინებს.

ამავე პროექტის მიხედვით, კანონს ემატება პუნქტი, რომლის მიხედვით, საქართველოში ზოგადი განათლების სფეროში სახელმწიფო პოლიტიკის ძირითად მიზნებს შორის არის მოსწავლის მიერ ეროვნული ტრადიციების გაცნობიერება და პატივისცემის განვითარება.

ამირან სალუქვაძე - მიუღებელი რეალობაა - ხელისუფლებას და ოპოზიციას ერთმანეთი აწყობთ
ქართული პრესის მიმოხილვა 25.05.2020
ნათია თურნავა - ყველა წინაპირობაა, რომ 2021 წელი წარმატებული წელი იყოს
თემურ ჩუბინიძე - ჩვენი მეშახტეები გმირები არიან
უძრავი ქონების პლატფორმა Livo სამშენებლო კომპანიებს უფასო კონსულტაციას გაუწევს
"ავერსი" მომხმარებელს ახალ პროექტს - "სააფთიაქო თაროს" სთავაზობს
„ევრონიუს საქართველო“ საცდელ მაუწყებლობას იწყებს