სალომე სამადაშვილი მოსამართლეების შესახებ კანონპროექტზე - ვენეციის კომისიის წევრები პირდაპირ აცხადებენ, რომ მათ ხელისუფლება დროს არ აძლევს

ვენეციის კომისიის წევრები პირდაპირ აცხადებენ, რომ მათ ხელისუფლება არანაირ დროს არ აძლევს, - ამის შესახებ „ერთიანი ნაციონალური მოძრაობის“ წევრმა სალომე სამადაშვილმა პარლამენტის პლენარულ სხდომაზე განაცხადა, რითაც გამოეხმაურა კობახიძის კაბინეტის მიერ მომზადებულ უზენაესი სასამართლოს მოსამართლეების შერჩევასთან დაკავშირებულ კანონპროექტს. სამადაშვილის თქმით, ხელისუფლებას კონტროლირებადი სასამართლო იმისთვის სჭირდება, რომ 2020 წლის საპარლამენტო არჩევნებისთვის გამოიყენოს.

„ვენეციის კომისიის წევრები პირდაპირ აცხადებენ, რომ მათ არანაირ დროს ხელისუფლება არ აძლევს და ფორსირებულად, დაჩქარებული გზით ცდილობთ, რომ თავს მოახვიოთ ადამიანებს კანონი, რომელიც უზრუნველყოფს მურუსიძე-ჩინჩალაძის „კლანის“ მმართველობას ჩვენს სასამართლო სისტემაში კიდევ ათწლეულობით. მე მესმის თქვენ ეს რატომ გჭირდებათ. კონტროლირებადი სასამართლო დღეს თქვენთვის სასიცოცხლოდ მნიშვნელოვანია იმიტომ, რომ ყოველი დღე, რომლითაც საპარლამენტო არჩევნებს ვუახლოვდებით, გვაახლოებს იმ დროსთან, როდესაც „ქართულ ოცნებას“ არანაირი შესაძლებლობა აღარ ექნება დემოკრატიული და სამართლიანი გზით შეინარჩუნოს ქვეყანაში ხელისუფლება. სასამართლო გჭირდებათ სწორედ იმისთვის, რომ მოიხმაროთ, როგორც პოლიტიკური მართვის ინსტრუმენტი, მათ შორის საარჩევნო პროცესებში.

საერთაშორისო თანამეგობრობა კარგად ხედავს იმ ფარსს, რაც თქვენ გაითამაშეთ ვენეციის კომისიასთან ვითომ მიმდინარე რეგულაციებთან დაკავშირებით და დარწმუნებული ვარ, ამაზე შესაბამის პასუხს მიიღებთ როგორც უახლოეს დღეებში, ასევე, იმ შეფასებებში, რომელიც გაკეთდება ქვეყანაში მიმდინარე რეფორმებთან დაკავშირებით და პირველ რიგში, სასამართლო სისტემის რეფორმასთან დაკავშირებით“, - განაცხადა სალომე სამადაშვილმა.

ლადო პაპავა - მოსახლეობა პოზიტიური დღის წესრიგის მოლოდინშია
ლევან კლიმიაშვილი - ტექნიკურ უნივერსიტეტში შუალედური გამოცდების ჩატარება გენერალური რეპეტიცია იყო ფინალური გამოცდებისთვის
ქართული პრესის მიმოხილვა 01.06.2020
ამირან სალუქვაძე - მიუღებელი რეალობაა - ხელისუფლებას და ოპოზიციას ერთმანეთი აწყობთ