არ მინდა ასეთი სახელი დავარქვა, არ იქნება ჩემგან ლამაზი, მაგრამ მრჩება შთაბეჭდილება, რომ სოფო კილაძე მეჯიბრება, - ამის შესახებ დეპუტატმა ეკა ბესელიამ „ინტერპრესნიუსს“ „ბავშვთა კოდექსში“ შესატანი ცვლილებების შეფასებისას განუცხადა.

ეკა ბესელიას განცხადებით, კანონპროექტზე მუშაობა ნაჩქარევად მიმდინარეობს, რაც შესაძლოა, საზიანო აღმოჩნდეს.

მისი თქმით, 2016 წელს ამ მიმართულებით განხორციელდა საერთაშორისო სტანდარტებთან მაქსიმალურად დაახლოებული ცვლილებები და იმედოვნებს, რომ ხარვეზები, რომელიც ახალ რედაქციას აქვს და რომელზეც საზოგადოების დიდი ნაწილი საუბრობს, გამოსწორდება.

„ამ პროცესს ვაკვირდები და გული მწყდება, რადგან ძალიან ბევრი კრიტიკული შეფასება იყო, თითქმის ყველა მხრიდან, ბევრი მიმართულებით. როდესაც ბავშვთა უფლებების რეფორმების თემაზე ვმუშაობდით და ძალიან დიდი რეფორმა დავამტკიცეთ 2016 წელს, მაქსიმალურად ავიღეთ საერთაშორისო სტანდარტი.

სოფო კილაძე მოუმზადებლად შეეხო ისეთ სფეროებს და ისეთ საკითხებს, რომ არ მოხდა კარგი ანალიზი. ეს ყველაფერი საჭიროებს სიღრმისეულ შესწავლას და ანალიზს. მე არ ვისურვებდი, რომ ასე ნაჩქარევად მოხდეს ისეთი გადაწყვეტილების მიღება, რომელიც არ იქნება კარგი ეფექტის მომტანი ბავშვის უფლებების მიმართულებით. ვფიქრობ ამას ფაქიზად მიდგომა სჭირდება და არა ჯიუტად“, - აღნიშნა ეკა ბესელიამ.

ბავშვთა უფლებებზე კანონპროექტი, ადამიანის უფლებათა კომიტეტზე განიხილება.

იხილეთ ვიდეო