პარლამენტის საგარეო ურთიერთობათა კომიტეტზე საზღვარგარეთ საქართველოს პარლამენტის დელეგაციის წევრთა შემადგენლობის შეცვლის საკითხზე დღეს იმსჯელებენ.
არსებული ინფორმაციით, ცვლილებები შეეხება „ქართული ოცნების“ ყოფილ დეპუტატებს, რომლებიც ამ ეტაპზე დამოუკიდებელი დეპუტატის სტატუსს ინარჩუნებენ.
აღნიშნულთან დაკავშირებით, განცხადება გააკეთა დეპუტატმა ეკა ბესელიამ, რომლის განცხადებითაც, პარლამენტის თავმჯდომარე ამ გზით ცდილობს ყოფილ თანაგუნდელებზე შურისძიებას.
ბესელიას ინფორმაციიით, ცვლილება შეეხება ევროსაბჭოს ქართულ დელეგაციას, რომლის წევრიც თავად არის. დეპუტატის განცხადებით, იმ შემთხვევაში, თუკი ეს ცვლილება განხორციელდება, პარლამენტის თავმჯდომარე დაარღვევს ევროსაბჭოს რეგლამენტს, ვინაიდან ცვლილების განხორციელება 2019 წლის იანვრამდე დაუშვებელია.
ბესელიას თქმით, აღნიშნული გადაწყვეტილება, საერთაშორისო ასპარეზზე საქართველოს ზიანს მიაყენებს.
„ეს არის ერთგვარი შურისძიება პარლამენტის თავმჯდომარის მხრიდან. აღნიშნულთან დაკავშირებით ინფორმირებულია ევროსაბჭოს გენერალური მდივანი, რომელმაც წერილობით დამიდასტურა, რომ 2019 წლის იანვრამდე ცვლილების განხორციელება არ შეიძლება“, – განაცხადა ეკა ბესელიამ.