საგამოძიებო ორგანო პირვანდელ ვერსიაზე რჩება და ცდილობს სხვების მიერ ჩადენილი დანაშაული არასრულწლოვან გ.ჯ.-ს გადააბრალოს, - ამის შესახებ ჟურნალისტებს ხორავას ქუჩაზე მომხდარი მკვლელობის საქმეზე ერთ-ერთი მსჯავრდებულის, გ.ჯ.-ს ადვოკატმა, ტარიელ კაკაბაძემ განუცხადა.
ის დღევანდელ სასამართლო სხდომაზე დასკვნით სიტყვას წარმოთქვამს.
„დასკვნით სიტყვაში ყურადღებას გავამახვილებ იმ მტკიცებულებებზე, რომელიც საქმეში არსებობს, რომელიც გამოვიკვლიეთ და რომელიც ცალსახად ადასტურებს დაცვის მხარის პოზიციას. პირველი ინსტანციის მიერ გამოტანილი განაჩენის შემდეგ გვქონდა მოლოდინი, რომ საგამოძიებო ორგანო გარკვეულ ნაბიჯებს გადადგამდა, რათა გამოესწორებინა ის უამრავი შეცდომა, რომელიც გამოძიების დროს დაუშვეს. რეალურად დადასტურდა, რომ გამოძიება სწორად და ობიექტურად არ იყო წარმართული. ნაცვლად იმისა, შეცდომები გამოესწორებინათ, საგამოძიებო ორგანო პირვანდელ ვერსიაზე რჩება და ცდილობს სხვების მიერ ჩადენილი დანაშაული ჩემი დაცვის ქვეშ მყოფს გადააბრალოს. ყველა სამართლებრივი გზით ვიბრძოლებთ და არ დავუშვებთ, რომ სხვა პირების მიერ ჩადენილი დანაშაული არ დაბრალდეს იმ პირს, რომელსაც ეს დანაშაული არ ჩაუდენია", - განაცხადა კაკაბაძემ.