განათლების მეცნიერებათა აკადემია საგანმანათლებლო რეფორმაში ერთვება

საქართველოს განათლების, მეცნიერების, კულტურისა და სპორტის სამინისტროსა და საქართველოს განათლების მეცნიერებათა აკადემიას შორის თანამშრომლობის მემორანდუმი გაფორმდა. ამის შესახებ „ინტერპრესნიუსს“ საქართველოს განათლების სამინისტროდან აცნობეს.

მათივე განმარტებით, ძირითადი მიმართულებები, რაზეც მხარეები ითანამშრომლებენ არის საგანმანათლებლო საქმიანობის პოპულარიზაციის ხელშეწყობა, სხვადასხვა სამეცნიერო და შემეცნებითი პროექტების ერთობლივად განხორციელება, მეცნიერთა ძალების კონსოლიდაცია, განათლების მეცნიერებათა დარგების კვლევები და სახელმძღვანელოების შექმნაში თანამშრომლობა.

განათლების მეცნიერებათა აკადემიის პრეზიდენტის ზურაბ ხონელიძის განცხადებით, ამ მემორანდუმით სათავე დაედო აკადემიის ჩართვას ახალ საგანმანათლებლო რეფორმის მიმდინარეობაში.

„ამ რეფორმის მნიშვნელობა საქართველოს განათლების აკადემიას ბოლომდე აქვს გააზრებული და დარწმუნებულები ვართ, რომ ეს თანამშრომლობა აუცილებლად მოიტანს დადებით შედეგს", - განაცხადა ზურაბ ხონელიძემ.