იურისტ ანა ნაცვლიშვილის შეფასებით, ზუგდიდის მე-6 სკოლის ყოფილი დირექტორის ია კერზაიას გარდაცვალების საქმის გამოძიების გაჭიანურება უფრო და უფრო აღრმავებს ეჭვებს და ამძიმებს პასუხისმგებლობას, რომელიც ამ საქმით „სახელმწიფოს და მმართველ პარტიას კისერზე "დაეკიდა".

მისივე თქმით, ამ შემთხვევაში მტკიცების ტვირთი სახელმწიფოს კისერზეა და მან ყველა ღონე უნდა იხმაროს, რომ ეს ეჭვები საზოგადოებაში აღარ არსებობდეს.

„განათლების სისტემის პოლიტიზირება და არჩევნებისთვის გამოყენება სამწუხაროდ, მრავალი წელია სერიოზული პრობლემაა ამ ქვეყანაში და ამ მრავალწლიანი პრობლემის ერთ-ერთი ყველაზე თვალსაჩინო, ტრაგიკული არის სწორედ ია კერზაიას საქმე. სახელმწიფო ამ შემთხვევაში არის ბრალდებული და მასზეა მტკიცების ტვირთი, რომ მან ყველა სამართლებრივი საშუალება გამოიყენოს, რათა დაგვიმტიცოს , რომ ამ საქმეში არ ყოფილა სახელმწიფოს და მმართველი პარტიის ინტერესი. ყველა ზომა, რომელსაც სამართალდამცველი ორგანოები გამოიყენებენ იმისთვის, რომ საქმეზე არ დადგინდეს სწრაფად და ეფექტურად სიმართლე უფრო და უფრო გააღრმავებს ეჭვს და ამძიმებს პასუხისმგებლობას, რომელიც ამ საქმით სახელმწიფოს და მმართველ პარტიას კისერზე დაეკიდა“, - განაცხადა ანა ნაცვლიშვილმა.

„რუსთავი 2“-ის ინფორმაციით, ევროპარლამენტარები მამუკა ბახტაძეს მიმართავენ და საქართველოს 2018 წლის ყველაზე არადემოკრატიული არჩევნების გამო აკრიტიკებენ. დოკუმენტში ცენტრალური ადგილი სხვა დარღვევებთან ერთად, ია კერზაიას გარდაცვალებას ეთმობა. ტელეკომპანიის ინფორმაციით, ევროპელი დეპუტატები საქართველოს პრემიერს ამ საქმის გამოძიებას და დამნაშავეთა დასჯას სთხოვენ.