პრემიერის განცხადებით, ხვალ წარმოადგენენ ინიციატივას, რომლის მიხედვითაც ბიუჯეტიდან განათლებისთვის გამოყოფილი თანხა გაიზრდება

„მარკეტინგისთვის განათლება არის ყველაზე ნაკლებად საინტერესო ინვესტიცია და მივიღეთ ის რაც მივიღეთ. მისი წილი ბიუჯეტში ყოველთვის ძალიან მცირე იყო,“ - ამის შესახებ პრემიერ-მინისტრმა მამუკა ბახტაძემ ტექნოპარკში სტუდენტებთან შეხვედრისას განაცხადა. მისი თქმით, ხვალ მთავრობის სხდომაზე წარმოდგენილი იქნება ინიციატივა, რომლის მიხედვითაც ბიუჯეტიდან განათლებისთვის გამოყოფილი თანხა გაიზრდება.

როგორც პრემიერმა სტუდენტებთან შეხვედრისას აღნიშნა, პოლიტიკური ცხოვრების დიაპაზონი არჩევნებიდან არჩევნებამდე განისაზღვრება, თუმცა მისი თქმით, ამისგან განსხვავებით, განათლებას გრძელვადიანი ეფექტი აქვს.

„ხვალ არის ერთ-ერთი ყველაზე მნიშვნელოვანი დღე ჩემს ცხოვრებაში. ხვალ არის მთავრობის სხდომა, სადაც გამოდის ძალიან მნიშვნელოვანი ინიციატივა, რომელზეც ძალიან დიდი ხანია ვმუშაობ. ჩვენ ეს ინიციატივა რამდენიმე კვირის წინ დავაანონეთ, რომლის მიხედვითაც გვექნება ახალი კანონი და ამ კანონის მთავარი არსი გახლავთ ის, რომ ჩვენი ეკონომიკის 6%, რომელიც ჩვენი ბიუჯეტის 25%-ია, ყოველთვის დაიხარჯება განათლებასა და ახალგაზრდობაზე.

ბუნებრივია, ნებისმიერი პოლიტიკური ძალისთვის არჩევნები მთავარ ორიენტირს წარმოადგენს და პოლიტიკური ცხოვრებაც, გარკვეულწილად, წარმოადგენს დიაპაზონს არჩევნებიდან არჩევნებამდე. განათლება ყველა ამ პუნქტისგან განსხვავდება იმით, რომ მას აქვს ძალიან გრძელვადიანი ეფექტი. მარკეტინგისთვის განათლება არის ყველაზე ნაკლებად საინტერესო ინვესტიცია და მივიღეთ ის, რაც მივიღეთ. მიუხედავად იმისა, რომ სიტყვიერად ყველა ამბობდა, რომ განათლება არის პრიორიტეტი, ფაქტობრივად, მისი წილი ბიუჯეტში ყოველთვის იყო ძალიან მცირე. აქედან გამომდინარე, კანონის სულისკვეთება იქნება სწორედ ეს, რომ ჩვენ დავაფიქსიროთ, რომ ეს არის პრიორიტეტი და ეს პრიორიტეტი უნდა ჩანდეს ბიუჯეტში,“ - განაცხადა მამუკა ბახტაძემ.

თამარ გაბუნია - ეპიდემიის გავრცელების მაჩვენებელი ჯერ კონტროლის ფარგლებში რჩება, თუმცა გარკვეული შერბილებების შემდეგ, რაღაცნაირად მოვდუნდით
ზვიად კირტავა - მთავარია, ყველა მოქალაქემ გააცნობიეროს - თუ სწორად მოექცევა ჯანმრთელობას, სამუშაოს და ბიზნესსაც შეინარჩუნებს, თუ წესებს დაივიწყებს, ყველას და ყველაფერს რისკის ქვეშ დააყენებს
ქართული პრესის მიმოხილვა 01.06.2020
"დიჯიტალ ტვ" საიუბილეო აქციას იწყებს
„დრესაპ ჯგუფის“ მაღაზიები გაიხსნა