რუსეთი მიიჩნევს, რომ ნატო რეგიონში წარმოადგენს დესტაბილიზაციის წინაპირობას, რაც ბუნებრივია, ასე არ არის, - ამის შესახებ საქართველოს საგარეო საქმეთა სამინისტროს წარმომადგენელმა ვლადიმერ კონსტანტინიდიმ რუსეთის საგარეო საქმეთა მინისტრის მოადგილის, გრიგორი კარასინის განცხადების კომენტირებისას განაცხადა, რომლის თანახმად, საქართველოში ნატო-ს სამხედრო აქტივობის გაზრდა, კავკასიაში მას დაძაბულობის ერთგვარ პლაცდარმად აქცევს.

როგორც საქართველოს საგარეო უწყების წარმომადგენელმა განაცხადა, რუსეთის ასეთი დამოკიდებულება სიახლეს არ წარმოადგენს.

„რუსეთის ფედერაციის მხრიდან მუდმივად ისმის ეს გზავნილები, ხშირად, სამწუხაროდ, არა გაფრთხილების, არამედ მუქარის შემცველი გზავნილები. რუსეთი მიიჩნევს, რომ ნატო რეგიონში წარმოადგენს დესტაბილიზაციის წინაპირობას, რაც ბუნებრივია, ასე არ არის. პირიქით, ნატო არის სწორედ ამ რეგიონში, შავი ზღვის რეგიონში სტაბილურობის ერთ-ერთი მთავარი გარანტი. რა თქმა უნდა, რუსეთი ცდილობს, რომ თავისი დესტრუქციული ქმედებები დააბრალოს ნატო-ს ასეთ უპრეცედენტო აქტივობას",- განაცხადა კონსტანტინიდიმ.

მისივე თქმით, ნატო-ში საქართველოს გაწევრიანება შეუქცევადი პროცესია, რომელიც ადრე თუ გვიან აუცილებლად მოხდება.

„ნატოში გაწევრიანება არის ჩვენი ქვეყნისა და ხალხის საერთო გადაწყვეტილება. ის ეფუძნება ქართველი ხალხის ღიად დაფიქსირებულ ნებას. ეს არის შეუქცევადი პროცესი და უბრალოდ დროის ამბავია. შესაბამისად, საქართველო ამ კურსის ერთგული რჩება. გარდა ამისა, ალიანსის მხრიდანაც არაერთხელ აღინიშნა და ეს გაჟღერდა ამჯერად ამერიკის შეერთებულ შტატებშიც, რომ არც ერთ მესამე სახელმწიფოს არ აქვს უფლება, უკარნახოს სუვერენულ სახელმწიფოს თავის მიერ მიერ არჩეული კურსი", - აღნიშნა კონსტანტინიდიმ.

შეგახსენებთ, რუსეთის საგარეო საქმეთა მინისტრის მოადგილე გრიგორი კარასინმა ჟენევის საერთაშორისო მოლაპარაკებების 47-ე რაუნდის დასრულების შემდეგ ქართველ ჟურნალისტებს განუცხადა, რომ საქართველოში ნატო-ს სამხედრო აქტივობის გაზრდა, კავკასიაში მას დაძაბულობის ერთგვარ პლაცდარმად აქცევს.