“ევროპული საქართველოს“ წევრის, ზურაბ ჭიაბერაშვილის განცხადებით, “ევროპული საქართველოს“ მთავარი პრეტენზია ეროვნული ბანკის პრეზიდენტთან ის საბანკო რეგულაციებია, რომელმაც ათიათასობით ადამიანი აზარალა.

ზურაბ ჭიაბერაშვილის შეფასებით, ახალი საბანკო რეგულაციები ეკონომიკის ძალიან ბევრ სექტორში უმუშევრობას ზრდის.

“თუკი მაღაზიებში გაყიდვები არ იქნება, დაიკარგება სამუშაო ადგილები და კიდევ უფრო მეტი ადამიანი დარჩება ვალაუვალი. ეროვნულმა ბანკმა რეგულაციებს აუცილებლად უნდა გადახედოს, რადგან ის კლავს ეკონომიკას და ზრდის უმუშევრობას”, - აღნიშნა ზურაბ ჭიაბერაშვილმა.

პარლამენტის პლენარულ სხდომაზე ეროვნული ბანკის პრეზიდენტს კობა გვენეტაძეს მოუსმენენ.

გვენეტაძე “თიბისი ბანკთან“ დაკავშირებით ეროვნული ბანკის მიერ მიღებულ გადაწყვეტილებებსა და საცალო დაკრედიტების რეგულაციების შესახებ ისაუბრებს, რის შემდეგ მოსმენა კითხვა - პასუხის და დებატების ფორმატში გაგრძელდება.

როგორც ცნობილია, ფრაქცია “ევროპულმა საქართველომ“ ეროვნული ბანკის პრეზიდენტი პარლამენტის საფინანსო-საბიუჯეტო კომიტეტის სხდომაზე “თიბისი ბანკთან“ დაკავშირებით დაიბარა. ამასთან, ფრაქციამ კობა გვენეტაძე დარგობრივი ეკონომიკის კომიტეტის სხდომაზე საბანკო რეგულაციების თაობაზე მიიწვია. კომიტეტებში კობა გვენეტაძის მოსმენა არ გამართულა, თუმცა მან პარლამენტს მიმართა, რომ აღნიშნულ საკითხებზე ეროვნული ბანკის პრეზიდენტის მოხსენება პლენარულ სხდომაზე მოესმინათ.