გურჯაანის რაიონულ სასამართლოში ველისციხის ინციდენტის დროს, „ნაციონალური მოძრაობის“ წევრის შოთა დალაქიშვილის ცემის ბრალდებით დაკავებულების სასამართლო პროცესი გაიმართა. დღევანდელ სხდომაზე დაცვის მხარის მტკიცებულებები გამოიკვლიეს და ორი მოწმე დაკითხეს, მათ შორის, გასული წლის 16 დეკემბერს სოფელ ველისციხეში მომხდარი ინციდენტის უშუალო თვითმხილველი, მეორე კი "ნაციონალური მოძრაობის" კასპის რაიონული ორგანიზაციის ლიდერი.
დღეს დაკითხულმა მოწმეებმა დალაქიშვილის ცემის ფაქტი გაიხსენეს. მათი თქმით, ინციდენტის დროს, დალაქიშვილს ხელკეტებით შეიარაღებული პირები ფიზიკურად გაუსწორდნენ, რის შემდეგაც, მას მიღებული დაზიანებების გამო ოპერაცია ჩაუტარდა.
დაკავებულების გოჩა მაისურაძისა და მამუკა უსინაშვილის ადვოკატი "ნაციონალური მოძრაობის" მხრიდან მოწმეებზე შესაძლო ზეწოლაზე საუბრობს. ადვოკატი მაგული ღვალაძე მიიჩნევს, რომ დაკითხული მოწმეები მომხდარს იმაზე მწვავედ აღწერენ , ვიდრე რეალურად იყო. დაცვის მხარის სურვილის მიუხედავად, მხარეებს შორის საპროცესო შეთანხმების მიღწევა ამ დრომდე ვერ ხერხდება, რადგან შოთა დალაქიშვილი ამაზე უარს აცხადებს.
შეგახსენებთ, რომ ველისციხის ინციდენტიდან რამდენიმე დღეში, ბრალდებულები გოჩა მაისურაძე, მამუკა უსინაშვილი და თენგო ჯანიაშვილი პოლიციამ „ნაციონალური მოძრაობის“ წევრის შოთა დალაქიშვილის ცემის ბრალდებით დააკავა. საქმეზე გამოძიება 118-ე მუხლით მიმდინარეობს, რაც ჯანმრთელობის განზრახ ნაკლებად მძიმე დაზიანებას გულისხმობს.