6-13 აპრილს ბათუმის ახალი სპორტის სასახლე ძალოსანთა ევროპის ჩემპიონატს უმასპინძლებს. როგორც „ინტერპრესნიუსს“ განათლების, მეცნიერების, კულტურისა და სპორტის სამინისტროდან აცნობეს, ჩემპიონატში მონაწილეობას მიიღებს 40-ზე მეტი ქვეყნის 400 სპორტსმენი.
მათი ინფორმაციით, საქართველო დამოუკიდებლობის შემდეგ, მეორედ უმასპინძლებს ევროპირველობას.
„ევროპირველობის გახსნის ღონისძიებაში მონაწილეობა მიიღეს საქართველოს პრეზიდენტმა სალომე ზურაბიშვილმა, განათლების, მეცნიერების, კულტურისა და სპორტის მინისტრის პირველმა მოადგილემ მიხეილ გიორგაძემ და ევროპისა და საქართველოს ძალოსნობის ფედერაციის ხელმძღვანელმა პირებმა.
საქართველოს ძალოსანთა ნაკრები ერთი თვეა ბათუმში, ახალ სპორტის სასახლეში გადის მოსამზადებელ შეკრებას. გიორგი ასანიძის გუნდი ევროპირველობაზე პრაქტიკულად ოპტიმალური შემადგენლობით გამოვა. გუნდთან ერთად არის ოლიმპიური, მსოფლიოსა და ევროპის ჩემპიონი ლაშა ტალახაძე, რომელიც, რა თქმა უნდა, მძიმეწონოსანთა შეჯიბრის უმთავრესი ფავორიტია. მისი გამოსვლა 13 აპრილს იგეგმება.
გარდა მედლებისა, ევროპის ჩემპიონატზე გათამაშდება ტოკიოს 2020 წლის ოლიმპიური თამაშების ლიცენზიები.