აჭარის განათლების მინისტრის ინფორმაციით, რეპრესირებულთა სამარხებში აღმოჩენილ ნეშტებს პატივით დაკრძალავენ და მთავრობა მათი საფალავების მოწყობაზეც იზრუნებს

აჭარის განათლების, კულტურისა და სპორტის მინისტრის, ინგა შამილიშვილის განცხადებით, 1937-38 წლებში რეპრესირებულთა სამარხებში აღმოჩენილ ნეშტებს პატივით დაკრძალავენ და მთავრობა მათი საფალავების მოწყობაზეც იზრუნებს.

როგორც მან ჟურნალისტებთან საუბრისას განაცხადა, აღნიშნულთან დაკავშირებით, ადგილობრივი მთავრობა ბათუმისა და ლაზეთის ეპარქიასთან ერთად მუშაობს.

„საკითხის გადაწყვეტაში ბათუმისა და ლაზეთის ეპარქია, კერძოდ მეუფე დიმიტრი ჩართულია. ასევე ინფორმირებულია ადგილობრივი მთავრობა“, - განაცხადა ინგა შამილიშვილმა.

შეგახსენებთ, ბათუმისა და ლაზეთის ეპარქიამ, ბათუმში ფრიდონ ხალვაშის ქუჩის 338 ნომერში, 1937-1938 წლებში რეპრესირებულთა სამარხი აღმოაჩინა. მათი ინფორმაციით, ოთხ სამაროვანში 150-მდე ნეშტი უწესრიგოდ არის დამარხული. ეპარქიის ინფორმაციით, რეპრესირებულთა ნეშტებს 21 აპრილს დაკრძალავენ.