დიღმის მასივის მეოთხე კვარტლის მესამე მიკრორაიონის მე-5 კორპუსში მცხოვრებთა ნაწილი თბილისის მერიას დახმარებას სთხოვს.
როგორც ადგილობრივებმა „ინტერპრესნიუსთან“ საუბრისას აღნიშნეს, აფეთქების შედეგად მნიშვნელოვნად დაზარალდა მათი ბინები. განსაკუთრებით იმ სადარბაზოს პირველი, მეორე, მეოთხე სართულები, სადაც აფეთქება მოხდა.
მოქალაქეთა განცხადებით, დაზიანებულია როგორც კედლები, ასევე ჭერი და აღნიშნავენ, რომ ბინებში ყოფნა სახიფათოა. ისინი თბილისის მერიას საცხოვრებელი ფართებით დროებით დაკმაყოფილებას და სარემონტო სამუშაოებში დახმარებას სთხოვენ.
ამასთან მე-4 კორპუსის მცხოვრებლები თქმით, მე-5 კორპუსში აფეთქების შედეგად გამოწვეულმა წნევამ დააზიანა მათი ბინების კედლები, დეფორმირება მიიღო კარებებმა და ფანჯრებმა, დამტვრეულია წვრილმანი ინვენტარიც. აღნიშნულიდან გამომდინარე, კორპუსის მცხოვრებთა ნაწილი შესაბამისი სამსახურების მიერ კორპუსის მდგრადობის შესწავლას მოითხოვს.
მე-5 კორპუსში დღეს აფეთქება მოხდა, რის შედეგადაც 7 ადამიანი დაშავდა.