ჩვენმა კოლეგებმა ოპოზიციიდან გააკეთეს ყველაფერი, რომ კენჭისყრა არ შემდგარიყო, მაგრამ პროცედურული ომი დასრულებულია, კანონი კი მხარდაჭერილია, - ამის შესახებ განათლების, მეცნიერებისა და კულტურის კომიტეტის თავმჯდომარე მარიამ ჯაშმა სკოლებში გამოსაშვები გამოცდების გაუქმების კანონპროექტზე საუბრისას განაცხადა.

მისი თქმით, პოლიტიკური მხარდაჭერის პრობლემა აღნიშნულ კანონს არ ჰქონდა, ეს იყო მხოლოდ ტექნიკური საკითხი.

„შესაბამისად დღეს უკვე საატესტატო და ეროვნულ გამოცდებს შორის არსებული დუბლირება არის აღმოფხვრილი, 11-ე და 12-ე კლასის გამოცდების ჩატარება კანონის დონეზე ამოღებულია",- განაცხადა ჯაშმა კანონპროექტის დამტკიცების შემდგომ.

მან ასევე აღნიშნა, რომ განათლების რეფორმასთან დაკავშირებით შემდგომი ნაბიჯი განათლების სამინისტროდან სამუშაო პროექტის მიღება იქნება.

„პირველი ნაბიჯი, რომელიც გადადგმულია საატესტატო გამოცდების რეფორმასთან დაკავშირებით, ემსახურება იმ დუბლირების, ორი ცენტრალიზებული, მაღალი რისკის გამოცდებიდან უფრო ეფექტური და რეზონული სისტემის მიღებას. აპრილის ბოლოს ველოდებით განათლების სამინისტროდან სამუშაო დოკუმენტს, რომელშიც იქნება აღწერილი კომპლექსურად როგორც ეროვნულ გამოცდებთან მიმართებაში მომავალი წლისთვის დაგეგმილი ცვლილებების სამუშაო პროექტი, ასევე სკოლის ეტაპზე, მეოთხე, მეექვსე და მეათე საფეხურებზე სადიაგნოსტიკო და შეფასებითი გამოცდების სისტემა. მოსწავლეებს სჭირდებათ საინტერესო და შემოქმედებითი სასწავლო გარემო და სწორედ ამ გარემოთი უნდა უზრუნველვყოთ მათი დაინტერესება და სკოლაში ჩართულობა და არა - ხისტი საგამოსტო სისტემით, რომელიც ხარისხობრივად ნამდვილად არ აუმჯობესებდა სასწავლო გარემოს", - განაცხადა ჯაშმა.

პარლამენტმა სკოლებში გამოსაშვები გამოცდების გაუქმების ინიციატივას მხარი 80 ხმით დაუჭირა.