თურქეთის მმართველი „სამართლიანობისა და განვითარების პარტია“ ქვეყნის ცესკო-ს მოსთხოვს სტამბოლის მერის განმეორებითი არჩევნები გაიმართოს. ამის შესახებ მმართველი პარტიის თავმჯდომარის მოადგილემ, ალი იხსან იავუზმა განაცხადა.
აქამდე თურქეთის მმართველმა პარტიამ სარჩელით მიმართა ცესკო-ს, სტამბოლში მერის არჩევნების შედეგებთან დაკავშირებით, რომელშიც ოპოზიციის კანდიდატი იმარჯვებს და ცესკო-მ ხმების გადათვლა დაიწყო.
„ვაპირებთ მოვითხოვოთ სტამბოლში განმეორებითი არჩევნების ჩატარება. საუბარია არა უბრალოდ დარღვევებზე და შეცდომებზე, არამედ ორგანიზებულ ჩარევაზე. ბოლომდე წავალთ და ყველა კანონიერ მეთოდს გამოვიყენებთ. ამის შემდეგ გამოძიება დაიწყება. ვინც დარღვევებთან კავშირშია პასუხს აგებს კანონის წინაშე. თუმცა, საბოლოო სიტყვა ცესკო-ზეა“, - განაცხადა ალი იხსან იავუზმა.
შეგახსენებთ, რომ ოპოზიციის კანდიდატმა იმამოგლუმ სტამბოლის მერის არჩევნებზე გამარჯვება გამოაცხადა. მისი კონკურენტი მმართველი პარტიის კანდიდატი ბინალი ილდირიმი იყო.