საქართველოს დამოუკიდებლობის აღდგენის აქტზე ერთ-ერთი ხელისმომწერი, ენათმეცნიერი ნოდარ ნათაძე აცხადებს, რომ 1989 წლის 9 აპრილი საქართველოსთვის იყო როგორც ტრაგიკული თარიღი, ასევე უდიდესი ტრიუმფი.

როგორც ნათაძემ ჟურნალისტებს სახელმწიფო ცერემონიების სასახლეში 9 აპრილისადმი მიძღვნილ მიღებაზე განუცხადა, საქართველოს პირველმა პრეზიდენტმა, ზვიად გამსახურდიამ დატოვა რეფერენდუმით დამოწმებული დამოუკიდებლობა.

„ეს არის ტრაგიკული თარიღი, როდესაც საქართველომ უზარმაზარი გლოვა განიცადა. ამასთან, ეს არის უდიდესი ტრიუმფი. ზვიად გამსახურდიამ დატოვა დამოუკიდებლობა, მაგრამ არა უბრალოდ დამოუკიდებლობა, არამედ, რეფერენდუმით დამოწმებული დამოუკიდებლობა. გადამწყვეტი ეს არის. სალომე ზურაბიშვილმა ამის წინანდელ გამოსვლაში, სწორედ ეს შენიშნა და ამას გაუსვა ხაზი“, - განაცხადა ნათაძემ.

საქართველოს პრეზიდენტმა სალომე ზურაბიშვილმა, სახელმწიფო ცერემონიების სასახლეში, 9 აპრილს დაღუპულთა ოჯახის წევრებისა და საქართველოს სახელმწიფოს დამოუკიდებლობის აღდგენის აქტის ხელმომწერებისათვის მიღება გამართა. მიღებაზე მოწვეულ სტუმრებს სიტყვით მიმართეს: საქართველოს პრეზიდენტმა, საქართველოს ვიცე-პრემიერმა მაია ცქიტიშვილმა, საქართველოს სახელმწიფოებრივი დამოუკიდებლობის აღდგენის აქტის ხელმომწერთა ნაწილმა და პარლამენტის თავმჯდომარის მოადგილემ, ვიცე-სპიკერმა ზვიად ძიძიგურმა.