თურქეთის პრეზიდენტმა რეჯეფ თაიფ ერდოღანმა ვარაუდი გამოთქვა, რომ სტამბოლში მერის არჩევნებზე გამოვლენილი დარღვევების გამო, არჩევნების შედეგები შესაძლოა, გაუქმდეს. ამის შესახებ თურქეთის პრეზიდენტმა ჟურნალისტებთან საუბრისას განაცხადა.

„თუ ისეთ ქალაქში, როგორიც სტამბოლია, სადაც 11 მილიონი ამომრჩეველი ცხოვრობს, ხმებს შორის სხვაობა 30 ათასს შეადგენს, ხოლო გასაჩივრების შემდეგ ეს სხვაობა 13 ათასამდე შემცირდა, მაშინ ჩვენ უნდა გავაგრძელოთ ბრძოლა. ყველა ეჭვი უნდა გაქრეს. ამ სიტუაციამ შესაძლოა, არჩევნების შედეგების გაუქმებაც კი გამოიწვიოს“, - განაცხადა რეჯეფ თაიფ ერდოღანმა.

შეგახსენებთ, რომ ოპოზიციის კანდიდატმა იმამოგლუმ სტამბოლის მერის არჩევნებზე გამარჯვება გამოაცხადა. მისი კონკურენტი მმართველი პარტიის კანდიდატი ბინალი ილდირიმი იყო.